प्रचण्डको आक्रोश: बढी हेपाइ भयो, ‘जनयुद्ध’ मा सहभागीहरू एक होऔं

काठमाडौं । प्रधानमन्त्री पुष्पकमल दाहाल प्रचण्डले ‘जनयुद्ध’मा सहभागी नेता–कार्यकर्तालाई एकतामा आउन अपील गरेका छन् ।

आज मंगलबारदेखि काठमाडौंमा सुरु भएको विधान सम्मेलनलाई सम्बोधन गर्दै प्रधानमन्त्री प्रचण्डले माओवादी ‘जनयुद्ध’ र यसको नेतृत्वलाई अलि बढी हेपाइ हुन थालेको बताए । जनयुद्धका उपलब्धिलाई अपमानित गर्ने छुट कसैलाई नभएको भन्दै उनले अघि भने, ‘माओवादी जनयुद्धमा सहभागी नेता कार्यकर्तालाई अब ढिलो नगरी एउटै मोर्चा र केन्द्रमा एकताबद्ध हुन अपील गर्न चाहन्छु ।’

जति ढिलो गर्यो, त्यति ठूलो क्षति हुने भन्दै उनले भने, ‘आउनुस् बसौं, कहाँ कमी भए समीक्षा गरौं ।’

एक भएर प्रतिवाद गर्ने हो भने क्रान्तिकारी आन्दोलनको रक्षा मात्र होइन, समाजवादी क्रान्तिको नयाँ लहर सृजना गर्न सकिन्छ भन्ने आत्मविश्वास रहेको समेत उनले बताए ।