सुन तस्करी प्रकरण: बयान दिन पूर्वसभामुख महरा सिंहदरबार पुगे

काठमाडौं । सत्तारुढ नेकपा माओवादी केन्द्रका नेता कृष्णबहादुर महरा सुन तस्करीबारे बयान दिन सिंहदरबारस्थित सुन छानबिन समितिको कार्यालयमा पुगेका छन्।

पूर्वसभामुखसमेत रहेका महरा समितिले डाकेपछि अहिले समितिको कार्यालयमा पुगेर बयान दिएका हुन्।

विद्युतीय सिगरेट (भेप) मा लुकाएर तस्करी भएको ९ किलो सुनका चिनियाँ तस्करसँग महरासँगको सम्पर्क देखिएको थियो ।

सीआईबीले महराको बयान कायज गराएर उनलाई प्रतिवादी कायम नगरीकन अनुसन्धान प्रतिवेदन बुझाएको थियो ।

चिनियाँ नागरिकले दुबईबाट ल्याएर भन्सारमा रोकिएको ‘भेप’ छुटाउन आफूले तत्कालीन भन्सार प्रमुखलाई ‘फोन मात्रै गरेको’ यसअघि अनुसन्धान अधिकृतहरूसँग बताएका थिए ।

त्रिभुवन अन्तर्राष्ट्रिय विमानस्थल भन्सार कार्यालयले भेप बरामद गरेपछि छुटाउनलाई उनले तत्कालीन भन्सारका प्रमुख प्रशासकलाई फोन गरेका गरेका थिए ।

शंका लागेपछि भन्सारले जाँच गर्दा गोदाममा भएको भेप नै परिवर्तन गरिएको खुलेको थियो ।