जलेश्वर कारागारमा क्षमताभन्दा बढी कैदीबन्दी

काठमाडौं । महोत्तरी जिल्ला सदर मुकाम जलेश्वरस्थित कारागारमा क्षमताभन्दा तीन गुणा बढी कैदीबन्दी राखिएका छन् । जलेश्वर नगरपालिकाको-१ स्थित सो कारागारमा दुई सय कैदीबन्दी राख्ने क्षमता भएपनि छ सय दुई राखिएका हुन् ।

सोही कारण कारागारभित्रका कैदीबन्दीमा विभिन्न समस्या उत्पन्न हुन थालेको जलेश्वर कारागार कार्यालय महोत्तरीले जनाएको छ । विसं १९१३ मा एक बिघा क्षेत्रफलमा निर्माण भएको दशकौँ पुराना सो कारागारको भौतिक संरचना पनि जीर्ण बनेको जनाइएको छ । सो कारागारमा हाल ३८ भारतीयसहित छ सय दुई कैदीबन्दी बस्दै आएको बताइएको छ ।

लामो समयदेखि मर्मतसम्भार नहुँदा कारागारमा वर्षाका समयमा पानी चुहिने, गर्मीको समयमा अत्यधिक गर्मी हुने र जाडोको बेला अत्यधिक जाडो भएर कैदीबन्दीको बसाइ कष्टकर हुने गरेको जनाइएको छ । अहिले कैदीबन्दीलाई सुत्ने, बस्ने, खाने तथा शौचालय र पानीको समेत समस्या हुन थालेको एक चौकीदारले बताए ।