विनोद चौधरीले पनि बाँसबारीको सरकारी जग्गा हडपेको भेटियो, पक्राउ गर्न खोज्दै सीआईबी

काठमाडाैं। अर्बपति व्यवसायी विनोद चौधरी पनि ​बाँसबारी छालाजुता कारखानाको जग्गा हिनामिना प्रकरणमा तानिएका छन् ।

बाँसबारी छाला जुत्ता कारखानाको १० रोपनी भन्दा बढी जग्गा हडपेको उक्त आरोपमा नेपाली कांग्रेसका सांसद समेत रहेका उनका भाइ अरुण चौधरीलाई नेपाल प्रहरीको केन्द्रीय अनुसन्धान ब्यूरो (सीआईबी)ले आजै पक्राउ गरे लगत्तै विनोद चौधरीले समेत ठूलो परिमाणमा जग्गा हडपेको पाइएको छ। उक्त बाँसबारी छालाजुत्ता कारखानाको नाममा रहेको १० रोपनी जग्गा चौधरी ग्रुपले नियमविपरीत गएर निजी बनाएको खुलेको छ ।

सो प्रकरणमा विनोद चौधरीलाई समेत पक्राउ गर्न खोजी कार्य जारी रहेको सीआईबी उच्च स्रोतले बतायो ।

‘अरुण चौधरी मात्र हैन, विनोद चौधरीकै नाममा पनि २ हजार कित्ता सरकारी जग्गा भेटिएको छ,’ प्रहरी स्रोतले भन्यो, ‘सरकारी जग्गा हिनामिना गर्ने कसैलाई नछाड्नू भन्ने आदेश छ । सीआईबीले विनोद चौधरीलाई पनि खोजिरहेको छ । उनी उम्किने ठाउँ छैन ।’

पञ्चायतकालदेखि नै जग्गा हिनामिना गरेको पाइएको प्रहरीले बताएको छ।

‘२०४२ सालमा पञ्चायतको पालादेखि प्रजातन्त्रकालसम्म उनीहरूले सरकारी जग्गा हडपेको पाइयो,’ प्रहरी स्रोतले भन्यो ।

चौधरी समूहले हडपेको जग्गामा चाँदबाग स्कूल सञ्चालन गरिएको छ भने अहिले अर्को अपार्टमेन्ट बनाउने तयारी छ ।