बालकुमारी घटनामा यसरी भयो २३ वर्षीय युवकको मृत्यु

काठमाडौं । ललितपुरको बालकुमारीमा आज (शुक्रबार) भएको आन्दोलनमा ज्यान गुमाउने युवकको परिचय खुलेको छ । ग्वार्कोस्थित किस्ट अस्पतालका अनुसार उनी जुम्लाका २३ वर्षिय सुजन राउत हुन् ।

अस्पतालका चिफ अफ अपरेसन अमिस पाठकका अनुसार मध्यान्न १२ः४० बजे उनलाई अचेत अवस्थामा अस्पताल ल्याइएको थियो । तत्काल मेडिकल टिमले सीपीआर दिएर जगाउने प्रयास गर्दा पनि सफल नभएको उनले बताए । अस्पतालले दिउसो १ः१७ मा उनलाई मृत घोषणा गरेको हो ।

अहिले अस्पतालमा प्रहरी र प्रशासनको टोली आएको छ । मृतकको छातिमा कालो डाम देखिएको छ । यद्यपि, शरीरमा गोली भेटिएको छैन । पोस्ट मार्टमबाट मृत्यूको मात्र कारण खुल्ने डा. पाठकले जानकारी दिए ।