सामान्य प्रशासनमा ब्याकडेटमा ब्यापक सरुवा, मन्त्री साह बेखबर

काठमाडौं । संघीय मामिला तथा सामान्य प्रशासन मन्त्रालयका सचिव कृष्णहरि पुस्कर कर्णको सरुवा बुधबारै प्रधानमन्त्री तथा मन्त्रिपरिषद कार्यालयमा भएको छ । तर उनी शुक्रबार बिहानसम्म पनि सामान्य प्रशासन मन्त्रालयमा सरुवा गर्ने कार्यमा सरिक भइरहेका छन् ।

बीरगंजमा रहेका सचिव पुस्करसँगकै सहमतिमा सामान्य प्रशासन मन्त्रालयको कर्मचारी प्रशासन महाशाखाका प्रमुख हेमराज तामाङ, कर्मचारी शाखाका उपसचिवद्वय खिलराज राई र कमानसिंह थापामगरले साउन २३ र २४ गतेको मिति राखी बुधबार, बिहीबार, शुक्रबार बिहानसम्म सरुवा गरिरहेको स्रोतले बताएको छ ।  शुक्रबार बिहानसम्म पनि केही नासुहरुको सरुवा तामाङ, राई र थापामगरले गरेको स्रोतले बताएको छ । खिलराज राई र कमानसिंह थापा माओवादी निकट उपसचिव हुन् । उनीहरुले नै सरुवाको सूची बनाउने र महाशाखा प्रमुख तामाङले सदर गर्ने गरेका छन् ।

जनमत पार्टीकी मन्त्रीको सचिवालयसमेतले पूर्णता नपाएको अवस्था छ । संघीय ममिलात तथा सामान्य प्रशासन मन्त्री अनितादेवी साह सचिव पुस्करको समेत सहमतिमा ब्याकडेटमा भइरहेको सरुवाबारे बेखबर छिन् ।

पुस्करले मोदीको आज्ञा शिरोपर गर्दै आफ्नो साढे ५ महिने कार्यकाल बिताएर बुधबार सरुवा भए । मोदीको कार्यकालमा भएका अधिकांश सरुवा विवादित बनाउने काम पनि पुस्करले नै गरेका थिए । मोदीले मन्त्रीबाट पदमुक्त हुनुअघि स्थानीय तहको प्रमुख प्रशासकीय अधिकृतमा सरुवा गरेका उपसचिवहरु कोही पनि खटाएको पालिकामा अहिलेसम्म हाजिर गर्न गएका छैनन् । मोदीको आदेशमा सरुवा गरेको एक साताभित्र हाजिर हुन नगए कारबाही गर्ने सूचना जारी गरेका थिए पुस्करले । तर मोदीको बहिर्गमनपछि उनले गरेका ती सबै उपसचिवहरुको सरुवा कार्यान्वयन नगरी पत्र नै गायब बनाएर गाईजात्रा प्रदर्शन गरेका छन् ।

लामो समय मन्त्रालय र बिभिन्न निकायमा कार्यरत स्थानीय तहमा सरुवा भएका भूमिब्यवस्था मन्त्रालयदेखि लोकसेवा आयोगदेखि विभिन्न विभागका ३४ जना उपसचिवहरुलाई पुस्करले पत्र नै नदिएका कारण उनीहरुको सम्बन्धित मन्त्रालयले आन्तरिक सरुवा गरिसकेको छ । ती ३४ जना उपसचिवलाई लेनदेनकै आधारमा सरुवा पत्र नदिएको आरोप सचिव पुस्करमाथि छ ।

बर्षौबर्ष सिंहदरबारमा राज गरेका उपसचिवहरुलाई स्थानीय तहमा खटाएको भन्दै मोदीले स्टन्टबाजी गरेका थिए । सरुवामा गरेको खुल्ला सेटिङ ढाकछोप गर्ने अस्त्र बनाएका थिए ३४ उपसचिवको सरुवा । तर त्यो पनि उनैले ल्याएका सचिव पुस्करले कार्यान्वयन गरिदिएनन् । सरुवा भइसकेका सचिव पुस्करको योजनामा सरुवामा गोलमाल गर्ने सहसचिव तामाङ पनि संस्कृति, पर्यटन तथा नागरिक उड्डयन मन्त्रालयमा सरुवा हुँदैछन् ।