एक लाख घुस लिने प्रहरी हवल्दार पक्राउ, इन्चार्ज चन्द पनि छानबिनमा तानिने

काठमाडौं । प्रहरी प्रभाग बुढानीलकण्ठका इन्चार्ज इन्स्पेक्टर दीपेन्द्र चन्दका विश्वासपात्र प्रहरी वरिष्ठ हवल्दार बिष्णु सिंहलाई अख्तियार दुरुपयोग अनुसन्धान आयोगको टोलीले बुधबार साँझ १ लाख रुपैयाँ घुससहित नियन्त्रणमा लिएको छ ।

कुख्रे खोलाको बालुवा कारोबारीसँग घुस लिइसकेपछि सिंहलाई अख्तियारको टोलीले नियन्त्रणमा लिएको हो ।

कुख्रे खोलाको ढल सरसफाइ तथा निकास गर्दा निस्कने बालुवा व्यवस्थापन कार्य सहजीकरण गर्न सेवग्राहीबाट १ लाख घुस लिइसकेपछि उनी पक्राउ परेको र अनुसन्धान भइरहेको आयोगले जनाएको छ ।

बुढानीलकन्ठ प्रभागमा इन्चार्जका रुपमा दीपेन्द्र चन्द सरुवा भइसकेपछि उनले घुमुवा राखी जुवादेखि बालुवाबाट कमाउधन्दा संचालन गर्दैआएका छन् । सिंहलाई हवल्दार मेजरको रुपमा राखेका उनका बारेमा धेरै गुनासो पुगेपछि अख्तियारले निगरानी गरिरहेको थियो । बुधबार बालुवा कारोबारीसँग घुस लिइसकेकपछि उनी पक्राउ परेका छन् । इन्चार्ज चन्द समेत यो घुसकाण्डमा तानिने संभावना छ ।