एनपी साउँद भन्छन्- बालकृष्ण खाणलाई हतारमा निलम्बन गर्न हुँदैन

काठमाडौं। परराष्ट्र मन्त्री एनपी साउँदले नेपाली नागरिकलाई नक्कली भुटानी शरणार्थी बनाएर अमेरिका पठाउने प्रकरणमा मुछिएका बालकृष्ण खाणलाई हतारमा पार्टीको केन्द्रीय सदस्यबाट हटाउन नहुने दाबी गरेका छन् । आज (आईतबार) कांग्रेस केन्द्रीय समितिको जारी बैठकलाई सम्बोधन गर्दै उनले प्रत्यक्ष प्रमाणविनको मुद्दामा कसैलाई पनि हतारमा पार्टीले निलम्वन गर्न नहुने बताएका हुन् ।

‘भुटानी शरणार्थीको बारेमा पनि धेरै चर्चा चलिराखेको छ । कहिले काही केही घटना र अपराधहरु यस्ता हुन्छन्, प्रत्यक्ष प्रमाण भए पार्टीबाट निकाल्दा हुन्छ । छानविनको प्रक्रियामा भाग्यो भने पनि पार्टीबाट तत्कालै निकाल्दा हुन्छ । अनुसन्धानको क्रममा अदालतको निर्णय नपर्खी हामीले हतारमा गर्यौ भने पार्टीको हित गर्दैन,’– उनले भने ।