अदालतमा पूर्वगृहमन्त्री खाँडको इन्कारी बयान– ‘कसैसँग कुराकानी र लेनदेन भएको छैन’

काठमाडौं । नेपाली नागरिकलाई नक्कली भुटानी शरणार्थी बनाएर अमेरिका पठाउने भन्दै करोडौं असुली गरेको आरोपमा पक्राउ परेका कांग्रेस नेता तथा पूर्वगृहमन्त्री बालकृष्ण खाँडले अदालतमा इन्कारी बयान दिएका छन् ।

उक्त प्रकरणमा पक्राउ परेका खाँडले जिल्ला अदालत काठमाडौंमा थुनछेक बहस हुनुअघि भएको बयानमा इन्कारी बयान दिएका हुन् ।

बयानमा खाँणले तत्कालीन गृहसचिव टेकनारायण पाण्डेको आरोपमा सत्यता नरहेको बताएका छन् । उनले बयानमा नक्कली भुटानी शरणार्थी प्रकरणका आरोपी केशव दुलालसँग भेट भएको भन्दै पाण्डेले लगाएको आरोप झुटो भएको जिकिर गरेका छन् । उनले कसैसँग कुराकानी र लेनदेन नभएको बयान दिएका छन् ।

खाँडले आङटावा शेर्पासँग कुरा नभएको र आफूले बयान फेर्न पनि नलगाएको बयान दिएका छन् । खाँणले आफूले पीडितलाई रकम फिर्ता गर्न नभनेको पनि बयान दिएका छन् ।