खाणको निलम्बनबारे देउवा स्वदेश फर्केपछि मात्रै कांग्रेसले निर्णय गर्ने

काठमाडौं। नक्कली भुटानी शरणार्थी प्रकरणमा पूर्व गृहमन्त्रि तथा कांग्रेस नेता बालकृष्ण खाण पक्राउ परेर जेल चलान हुँदासमेत उनको निलम्बनको विषयमा कांग्रेस अझै मौन बसेको छ । शुक्रबार काठमाडौं जिल्ला अदालतले पूर्व गृहमन्त्री खाण सहित १६ जनालाई पुर्पक्षका लागि जेल पठाउन आदेश दिएको थियो।

उक्त शरणार्थी प्रकरणमा जेल चलान भएपछि कांग्रेस केन्द्रीय सदस्य बालकृष्ण खाणको पदीय हैसियतमाथि नैतिक प्रश्न उठेको छ ।

तर, नेपाली कांग्रेसले खाँणलाई भने निलम्बन गर्ने वा नगर्ने निर्णय पार्टी सभापति शेरबहादुर देउवा स्वदेश फर्केपछि मात्रै गर्ने भएको छ ।

सभापति देउवा हाल उपचारका लागि सिंगापुर गएका छन् । देउवा असार ७ गते फर्केपछि मात्रै खाँणको विषयमा छलफल हुने प्रचार विभाग प्रमुख मीन विश्वकर्माले बताए । देउवाले कार्यवाहक सभापतिको जिम्मेवारी उपसभापति पूर्णबहादुर खड्कालाई दिएका छन् ।

तर उनले यस विषयमा जोखिम लिन नखोजेको देखिन्छ ।

२७ वैशाखमा नक्कली शरणार्थी प्रकरणमा परेका खाँणलाई शुक्रबार काठमाडौं जिल्ला अदालतले पुर्पक्षका लागि थुनामा पठाएको छ ।

अदालतको आदेश सुनेर बाहिरिने क्रममा सञ्चारकर्मीसँग संक्षिप्त कुराकानी गर्दै खाणले आफू निर्दोष रहेको जिकिर गरेका हुन्।

“म निर्दोष छु,” जिल्ला अदालत परिसरमा पूर्व गृहमन्त्री खाणले भने, “अझै पनि अदालतबाट न्याय पाउनेमा आशावादी छु।”

पक्राउ परेकै दिन र भोलिपल्ट पदाधिकारी बैठकमा महामन्त्रीद्वय गगन थापा र विश्वप्रकाश शर्माले खाणलाई तत्काल पार्टीको जिम्मेवारीबाट अलग गर्नुपर्ने प्रस्ताव राखेका थिए ।