गगन थापा भन्छन्- कांग्रेसमा परिवर्तन चाहने र रोक्ने गरी दुई गुटमात्र

काठमाडौं । नेपाली कांग्रेसका महामन्त्री गगनकुमार थापाले पार्टीभित्र अब दुई गुटमात्र रहेको बताएका छन् । उनले कांग्रेसमा परिवर्तन अवश्यम्भावी रहेको भन्दै अब परिवर्तन चाहने र रोक्ने गरी दुई गुटमात्र रहेको बताएका हुन् ।

ट्रेड युनियन कांग्रेस अन्तर्गतको युनिप्रेसले राजधानीमा आयोजना गरेको ‘आजको राजनीतिक अवस्था र ट्रेड युनियन’ नामक विचार गोष्ठीमा बोल्दै महामन्त्री थापाले अब परिवर्तन बिना कांग्रेसको अस्तित्व नरहने भन्दै त्यसका लागि एक जुट हुन सबैलाई आग्रहसमेत गरेका छन् ।

यसअघि विभिन्न गुट बनेका भए पनि अब निर्विकल्प रुपमा कांग्रेसको मौलिक अधिकारका लागि एक गुटमात्र हुनुपर्नेमा उनले जोड दिएका छन् ।

उनले पार्टीका व्यक्तिले चुनाव हारे पनि पार्टीको मूलभूत सिद्धान्तले जित्नुपर्ने भन्दै अब कसैसँग पनि एकता गर्न नहुनेमा जोड दिए ।

नेता थापाले कार्यकर्ताहरुमा सबैतिर निराशा छाएको भन्दै तल्लो तहका कार्यकर्ताका कुरा सुन्नका लागि त्यहाँ पुग्नुपर्ने बताए ।

उनले चुनावमा बेलामा कार्यकर्तालाई गठबन्धनकै कारण जताततै भोट हाल्न लगाइँदा कार्यकर्तामा निराशा छाएको भन्दै त्यो गल्ती अब दोहोर्याउन नहुने बताएका छन् ।