वीर अस्पतालको अनलाइन सिष्टम डाउन हुँदा ओपीडी काउण्टर अस्तव्यस्त

काठमाडौं।काठमाडौंको वीर अस्पतालको अनलाइन सिष्टममा समस्या आएको छ। उक्त सिष्टममा समस्यापछि ओपीडी टिकट काउण्टर अस्तव्यस्त बनेको छ । आधा घण्टाअघि सिष्टमले काम नगरेपछि अनलाइनमार्फत् हुने काम रोकिएका छन् ।

विद्युत् सेवा काटिएको र जेनेरेटरले तत्काल काम नगरेपछि समस्या आएको अस्पतालका प्रशासन प्रमुख सागर मिश्रले जानकारी दिए ।

“लाइन गयो, जेनेरेटरले काम नगरेपछि कम्प्युटरमार्फत् काम हुन सकिरहेको छैन । यो ठूलो समस्या होइन, हामी छिट्टै बनाइहाल्छौँ,” मिश्रले भने ।

अनलाइन माध्यमबाट काम नभएपछि ओपीडीमा आउने बिरामीलाई कार्डमा विवरण नराखी सम्बन्धित ओपीडीको छाप लगाउँदै पठाउँदै गरिएको छ । वीरमा यसअघि गतवर्ष जेठमा पनि सर्भर डाउन हुँदा दुई दिनसम्म सेवा प्रभावित भएको थियो ।