टोपबहादुर पार्टीको सम्पर्कमा नरहेको एमालेको दाबी

काठमाडौं । नेकपा एमालेले नक्कली भुटानी शरणार्थी प्रकरणमा पक्राउ पुर्जी जारी भएपछि सचिव टोपबहादुर रायमाझी पार्टीको सम्पर्कमा नरहेको दाबी गरेको छ । पार्टीको केन्द्रीय कमिटीको पहिलो दिनको बैठकपछि प्रवक्ता पृथ्वीसुब्बा गुरुङले यस्तो बताएका हुन् ।

उनले टोपबहादुर सम्पर्कविहीन भएकै कारणले पार्टीले निलम्बन गरेको बताए । अनुसन्धानमा सघाउन पार्टीले निर्देशन दिइसकेको भएपनि अहिलेसम्म कुनै सम्पर्कमा नआएको उनको दाबी छ ।

उनले भने, ‘उहाँ जुन दिनदेखि सम्पर्कमा रहनुभएन । त्यो दिनदेखि हामीलाई थाहा छैन । प्रहरीलाई थाहा भएको भए समातेर ल्याउँथ्यो होला । अस्ति सचिवालयको बैठकले नै विधि र कानूनको शासन मान्ने पार्टी भएकाले राज्यले गर्ने छानविन र अनुसन्धानमा सहयोग गर्नुपर्छ भनेको थियो । अपराधी नै भएको होइन नि अहिले त अभियोगमात्रै लागेको हो ।’