एसीसी प्रिमियर कपमा सन्दिप लामिछाने उत्कृष्ट खेलाडी घोषित

काठमाडौँ। एसिसी प्रिमियर कपमा नेपाली क्रिकेट टोलीका पूर्वकप्तान तथा प्रमुख बलर सन्दीप लामिछाने सर्वोत्कृष्ट खेलाडी घोषित भएका छन् । नेपाललाई एसिया कपमा पुर्याउन सन्दीपको ठुलो योगदान रहेको छ।

उनले प्रतियोगिताभर ५ खेलमा १३ विकेट लिए । ब्याटिङतर्फ सन्दीपले ४२ रन बनाए । यस्तै, यूएईका विकेटपिकर वृत्य अरविन्द प्रतियोगिताको उत्कृष्ट ब्याटर चुनिए ।

उनले प्रतियोगितामा ६ खेलमा २ शतक र १ अर्धशतकसहित कुल ४ सय ५४ रन बनाए । यस्तै, ओमानका तीव्र गतिका बलर बिलाल खान उत्कृष्ट बलर घोषित भए । उनले ६ खेलमा १७ विकेट लिए ।

नेपालले आज भएको फाइनलमा यूएईलाई ७ विकेटले हराउँदै आगामी सेप्टेम्बरमा हुने एसिया कपमा आफ्नो स्थान बनाएको छ। पाकिस्तानमा हुने उक्त प्रतियोगिताको समूह ‘ए’ मा नेपालसहित भारत र पाकिस्तान रहेका छन् ।