यूएईलाई ७ विकेटले हराउँदै नेपाल एसिया कपमा

काठमाडौं । संयुक्त अरब इमिरेटस (युएई) लाई पराजित गर्दै एसीसी मेन्स प्रिमियर कपको उपाधि नेपालले हात पारेको छ। उपाधि जित्दै यस वर्ष हुने एसिया कप क्रिकेट प्रतियोगिताका लागि नेपाल छनोट भएको छ ।

आज कीर्तिपुरस्थित टीयू मैदानमा भएको फाइनल खेलमा यूएईलाई ७ विकेटले हराउँदै नेपाल एसिया कपका लागि छनोट भएको हो ।

यूएईले दिएको ११७ रनको लक्ष्य नेपालले ३०।३ ओभरमा पुरा गरेको थियो । नेपालका लागि गुल्शन झा र भिम सार्कीले उत्कृष्ट साझेदारी गरे ।

२२ रनमै तेस्रो विकेट गुमाएको अवस्थाबाट उकास्दै उनीहरुले नेपाललाई जितसम्म पुर्याएका हुन् । गुल्शनले यूएईविरुद्ध दोस्रो अर्धसतक प्रहार गरेका छन् ।

वर्षाले प्रभावित भएपछि दुई दिन लगाएर खेल भएको हो । अघिल्लो दिन यूएईले ९ विकेट गुमाएर १०६ रन जोड्दा वर्षाले खेल अवरुद्ध भएको थियो ।

यसैगरी एसिया कप आगामी सेप्टेम्बरमा पाकिस्तानमा हुने गरी तय भएको छ ।