तुइनबाट खसेर महाकाली नदीमा एक जना बेपत्ता

धनगढी। दार्चुलास्थित महाकाली नदीमा तुइनबाट खसेर एक पुरुष बेपत्ता भएका छन्।

शनिबार साढे १ बजेकाे समयमा तुइनबाट खसेर व्यास गाउँपालिका २ तल्लो दुम्लिङका ४५ वर्षीय सिङ्दलसिंह भण्डारी बेपत्ता भएका हुन्।

सुदूरपश्चिम प्रदेश प्रहरी कार्यालयका प्रहरी उपरीक्षक (एसपी) श्याम चौधरीले आज दिउँसो साढे १ बजेतिर भण्डारी तुइनबाट खसेर बेपत्ता भएको खबर आएको बताए। उनका अनुसार बेपत्ता भण्डारीको खोजीमा अहिले ५ जना प्रहरीको टोली खटिएको छ।

भण्डारी नेपालबाट भारत जाने वेला तल्लो दुम्लिङस्थित तुइन घाटबाट खसेर बेपत्ता भएको बताइएको छ। महाकाली नदीमा तुइनबाट खसेर बेपत्ता भण्डारीको खोजीमा स्थानीयवासी पनि जुटेका छन्।