चौथो वरियताका ज्ञवालीलाई आईजीपी बनाउन मदिरा उद्योगीदेखि पूर्वमुख्यसचिवसम्मको दौडधूप

काठमाडौं । नेपाल प्रहरीका महानिरीक्षक (आईजीपी) धिरजप्रताप सिंहको अवकाश मिति ८ दिन बाँकी छ । ३० वर्षे सेवाअवधि नहटेमा आईजीपी सिंह यही चैत ११ गते अवकाशमा जानेछन् । ३० बर्षे सेवावधि हटाउने प्रयास भने भइरहेको छ । नेपाल प्रहरी, सशस्त्र प्रहरी बल र राष्ट्रिय अनुसन्धान विभागमा मात्रै ३० बर्ष सेवावधिका आधारमा अवकाश हुने विभेदकारी ब्यवस्था छ । नेपाली सेनामा ३० बर्षे सेवावधिमा अवकाश हुने प्रावधान छैन ।

निजामती सेवा, स्वास्थ्य सेवामा पनि छैन । नेपाल प्रहरीदेखि राष्ट्रिय अनुसन्धानमा रहेको विभेदकारी ३० बर्षे सेवावधिको ब्यवस्था हटाउने कुरा सधैं हुन्छ तर हटाउन भने कुनै पनि सरकारले सकेका छैनन् । यसपटक वर्तमान आइजीपी धिरजप्रताप सिंहले ३० बर्षे सेवावधिको प्रावधान हटाउन खोजेका छन् । ३० बर्षे सेवावधि हटाउन नसकेमा उनी चैत ११ गते अवकाश हुनेछन् ।

३० बर्षे सेवावधिको प्रावधान यथावत रहेमा आइजीपी सिंह अवकाश हुनेछन् । त्यसपछिका आइजीपीका दाबेदारहरुमा एआइजीमा सिफारिसमा परेका डीआईजीहरु बसन्तबहादुर कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्य छन् । यी पाँचमध्ये चौथो नम्बरका ज्ञवालीको नागरिकतामा उमेर विवाद छ । उनले नागरिकतामा उमेर ढाँटेर जागिर खाएको आरोप छ । अख्तियार दुरुपयोग अनुसन्धान आयोगमा समेत उनको नागरिकताका बारेमा उजुरी छ ।

अख्तियारले जन्ममिति विवादमा ज्ञवालीलाई बयानमा बोलाउने तयारी गरेको छ । स्रोतका अनुसार अख्तियारले प्रारम्भिक अनुसन्धानमा जन्ममिति फरक पाएपछि डीआईजी ज्ञवालीको बयान लिने तयारी गरेको छ । प्रहरी कितावखानाको अभिलेखमा समेत उनको जन्ममितिमा कैफियत भेटिएको छ ।

जन्ममिति ढाँटेर जागिर खाएका डीआइजी ज्ञवालीलाई आइजीपी बनाउन विवादित ब्यापारी रवि केसी साम दाम नै प्रयोग गरी लागेका छन् । मदिरा उद्योगका मालिक केसीले ज्ञवालीलाई आइजीपी बनाउन शक्तिकेन्द्रमा लानेदेखि लगानी समेत गर्ने आश्वासन दिएका छन् । मोरङको रंगेली ५ मा रहेको चण्डिका डिष्टिलरी रवि केसीकै हो । जुन डिष्टीलरीले करछली गरेको भेटिएपछि आन्तरिक राजस्व कार्यालय बिराटनगरले जरिवाना समेत गरेको थियो । बाह्रसिंगा बियर ८८४८ भोड्का, वल्ड दरबार जस्ता ह्वीस्कीको उत्पादक यति डिष्टीलरी पनि केसीकै हो ।

श्याम ज्ञवालीका दाजु प्रदेश १ (हाल कोशी)को डीआईजी हुँदादेखि केसीको सम्बन्ध कसिलो भएको र कोरोना महामारीमा बिराटनगर नाकाबाट निर्धक्क मदिरा भारततर्फ तस्करी गर्न सेटिङ मिलाउन सहयोग गरेको स्र्रोत बताउँछ । त्यही सम्बन्धका आधारमा भाइ ज्ञवालीलाई आइजीपी बनाउन केसीको दौडधूप चलेको छ । मदिरा उद्योगी केसीमात्र होइन, पूर्वमुख्यसचिव लीलामणि पौडेल पनि ज्ञवालीलाई आइजीपी बनाउने लबिङमा लागेका छन् ।

उमेर विवादमा मुछिएका ज्ञवालीलाई आइजीपी बनाउन पौडेलले प्रधानमन्त्री प्रचण्डलाई पनि भनसुन गर्दैआएका छन् । दाजु ठाकुर ज्ञवालीसँगको कलेज जीवनदेखिको निकटताका कारण पौडेलले पनि उनलाई आइजीपी बनाउने लबिङ गरेको बताइन्छ । केसी र पौडेलको भरमा ज्ञवाली आईजीपी बन्न कुदिरहँदा उनको उमेर विवादमा अख्तियारले चासो देखाएको छ ।