जसपाकै प्रमिला कुमारीले पनि गरिन् उपराष्ट्रपतिमा उम्मेदवारी दर्ता

काठमाडौं । नेपालको नयाँ उपराष्ट्रपति पदमा जनता समाजवादी पार्टी(जसपा) की प्रमिला कुमारीले पनि उम्मेदवारी दर्ता गराएकी छन् । आज शनिबार दिउँसो संघीय संसद भवन नयाँ बानेश्वरस्थित राष्ट्रपति तथा उपराष्ट्रपति निर्वाचन कार्यालय पुगेर उनले आफ्नो उम्मेदवारी दर्ता गराएकी हुन् ।

सत्तारुढ गठबन्धनमा रहेका प्रमुख दलबीच उपराष्ट्रपति जसपाले पाउने सहमति भएको थियो । तर राष्ट्रपति र उपराष्ट्रपतिमा फरक लिंग वा समुदाय हुनुपर्ने संवैधानिक व्यवस्थाको व्याख्याका क्रममा फरक फरक धारणाहरु सार्वजनिक भएका छन् ।

यसैगरी, जसपाले उपराष्ट्रपति पदका लागि राम सहाय यादव र प्रमिला कुमारी गरी महिला र पुरुष दुवै उम्मेदवार खडा गरेको छ । राम सहाय यादवले भने आफ्नो उम्मेदवारी दर्ता गरिसकेका छन्।