सरकारद्धारा डा.काफ्ले र बिष्ट सचिवमा बढुवा

प्रशासनतर्फ सचिव बढुवाका लागि कार्य सम्पादन मूल्याङ्कनका आधारमा पहिलो नम्बरमा काफ्ले, दोस्रो नम्बरमा नारायण शर्मा र तेस्रो नम्बरमा दिनेश घिमिरे सिफारिस भएका थिए । लेखापरीक्षणतर्फ सचिव बढुवाका लागि ज्येष्ठताका आधारमा विष्टको मात्रै नाम सिफारिस भएको थियो ।

मन्त्रिपरिषद् बैठकले प्रशासनतर्फ पहिलो नम्बरमा सिफारिस भएका काफ्लेलाई नै सचिवमा बढुवा गरेको छ । लेखापरीक्षणतर्फ ज्येष्ठताका आधारमा एकल सिफारिस भएका बिष्टलाई बढुवा गरेको हो ।

काफ्ले श्रम, रोजगार तथा सामाजिक सुरक्षा मन्त्रालयको श्रम सम्बन्ध तथा सामाजिक सुरक्षा महाशाखा प्रमुखको जिम्मेवारीमा छन् । विष्ट महालेखापरीक्षकको कार्यालयमा नायब महालेखापरीक्षकको जिम्मेवारीमा छिन् । उनी कार्यालयकी प्रवक्ता समेत हुन् ।

प्रशासनतर्फ संस्कृति, पर्यटन तथा नागरिक उड्डयन मन्त्रालयका सचिव महेश्वर न्यौपाने साउन १२ गतेदेखि अनिवार्य अवकाशमा गएपछि एक सचिव रिक्त भएको थियो । लेखापरीक्षणतर्फ महालेखा परीक्षकको कार्यालयमा कार्यरत उप–महालेखापरीक्षक रामुप्रसाद डोटेल पनि साउन १२ गते नै अनिवार्य अवकाशमा गएपछि एक पद रिक्त भएको थियो ।