ओली मनाउने जिम्मा प्रचण्डलाई

काठमाडौं । म‌ंगलबारको नेकपा स्थायी समिति बैठक एकलौटी ढंगले स्थगित गरेर प्रधानमन्त्री केपी शर्मा ओलीले नयाँ विवाद सिर्जना गरेका छन् । यसअघि नै तोकिएको स्थायी समिति बैठक एकल निर्णयबाट स्थगित गरेपछि पार्टीमा जटिल संकट देखा परेको थियो । 

यो अवस्थामा ओलीको कडा प्रतिवाद गर्नुपर्ने आवाज उठेपनि नेकपा अध्यक्ष पुष्पकमल दाहाल प्रचण्डले अहिले उत्तेजित हुन नहुने भन्दै अधिकांश स्थायी समितिलाई सम्झाएका थिए । 

ओली निकटका स्थायी समितिको अनुपस्थितिमा बसेको बहुमत सदस्यबीच भएको बैठकमा प्रचण्डले सहमतिमा जोड दिएका हुन् ।

सो बैठकले प्रम ओलीसँग सहमति गर्ने जिम्मा प्रचण्डलाई दिएको प्रवक्ता नारायणकाजी श्रेष्ठले जनाकारी दिएका छन् । मुठभेडको अवस्था भएकाले तत्कालै कडा कदम नचाल्ने भन्दै सहमति नै गर्नुपर्ने र यसको जिम्मा प्रचण्डलाई दिइएको बताइएको छ । 

यसअघि साथै रहेका उपाध्यक्ष वामदेव गौतमले प्रचण्ड समूहको साथ छोडेसँगै बहुमतबाट निर्णय गरेर अगाडि बढ्ने विषयमा प्रचण्ड समूह रोकिएको बुझिएको छ ।