वर्तमान अर्थमन्त्रीले देश बेच्न पनि बाँकी राख्दैनन्ः सहसचिव शोभाकान्त पौडेल

काठमाडौं । अर्थमन्त्री जनार्दन शर्माले बजेटको अघिल्लो दिन जेठ १४ गते मध्यरातमा नायबसुब्बा रघुनाथ घिमिरेलाई बोलाएर करका दरहरु परिवर्तन गरेको बिषयमा उनको चर्को आलोचना भइरहेको छ । मन्त्री शर्माले विद्युतीय गाडी लगायतका बस्तुमा करका दरहरु बढाएर देशलाई श्रीलंका बनाउन खोजेको आरोप लागेको छ ।

मध्यरातमा नासुलाई अर्थमन्त्रालयमा बोलाएर करका दरहरु बढाएको बिषयमा आलोचना गर्नेमा प्रमुख प्रतिपक्षी दल र नागरिक समाजमात्र होइन, अर्थमन्त्रालयमै कार्यरत रहिसकेका एक सहसचिव समेत छन् । ती सहसचिवले मन्त्री शर्माले देश बेच्न पनि पछि पर्दैनन् भनेर आरोप लगाउँदै सामाजिक संजालमा लेखेका छन् । अरु सामान्य नागरिकले त्यो आरोप लगाएको भए गम्भीरतापूर्वक लिनुपर्ने थिएन तर नेपाल सरकारका सहसचिव र कर प्रशासन हेर्ने आन्तरिक राजस्व विभागको महानिर्देशकको भूमिका निभाइसकेका ब्यक्तिले यस्तो टिप्पणी गरेका छन् ।

मन्त्री शर्मालेले नै अर्थमन्त्रालयको जिम्मेवारी सम्हालेको १ महिनापछि २०७८ भदौ ३ मा आन्तरिक राजस्व विभागको महानिर्देशक बनाएका र हाल संघीय मामिला तथा सामान्य प्रशासन मन्त्रालयमा कार्यरत सहसचिव शोभाकान्त पौडेलले मन्त्री शर्माले देश बेच्न पनि बाँकी नराख्ने आरोप लगाएका छन् । सोमबार सामाजिक संजाल ट्वीटरमा आर्य अरुणले अन्नपूर्ण पोष्टको ‘मध्यराति बजेटमा जब ‘चुकुल’ लाग्यो शीर्षकको समाचार सेयर गरेका थिए । आर्य अरुणले सेयर गरेको समाचारमा सहसचिव पौडेलले मन्त्री शर्माले देश बेच्न पनि बाँकी नराख्ने टिप्पणी गरेका हुन् । मन्त्री शर्माले अर्थमन्त्री नियुक्त हुनासाथ ल्याएको प्रतिस्थापन बिधेयक(संशोधित) बजेटमै करका दरहरु बढाउन खोजेको तथ्य रहस्य पनि पौडेलले खोलिदिएका छन् ।

 सहसचिव पौडेलले आफ्नो टिप्पणीमा लेखेका छन्–‘यो साँचो हो ! प्रतिस्थापन बिधेयकमा नै गर्न खोजेको थियो । वर्तमान अर्थमन्त्रीले देश बेच्न पनि बाँकी राख्दैनन् !’

  सहसचिव शर्माले ट्वीटरमा टिप्पणी गरेको केही समयमा उनले हटाएका छन् । तर त्यसबीचमा धेरैले स्क्रीनसट लिइसकेका थिए । अर्थमन्त्रालयकै उनका शुभचिन्तकले त्यस्तो टिप्पणीले अप्ठेरोमा पर्ने बताएपछि उनले उक्त टिप्पणी सोमबारै डिलिट गरेका छन् । मन्त्री शर्माकोबारेमा गरेको टिप्पणी हटाएकोबारेमा सहसचिव पौडेलसँग प्रतिक्रियाका लागि मंगलबार २ पटक  प्रयास गर्दा पनि उनी सम्पर्कमा आउन चाहेनन् । 

सहसचिव पौडेललाई मन्त्री शर्माले नै आन्तरिक राजस्व विभागको महानिर्देशक बनाएका थिए । ६ महिनामै उनका र उनका आफन्तका स्वार्थका काम नगरेपछि पौडेललाई २०७८ फागुन १ मा मन्त्री शर्माले अर्थमन्त्रालयबाटै संघीय मामिला तथा सामान्य प्रशासन मन्त्रालयमा सरुवा गरिदिएका थिए । 

मन्त्री शर्माले केही ब्यापारीको स्वार्थमा करका दरहरु परिवर्तन गर्दा अरब लाभ त लिएकै छन् । उनका आफन्तहरुले हुन्डाई जस्ता कम्पनीहरुबाट ६० लाख बराबरका केही गाडी समेत उपहार लिएको रहस्यसमेत पौडेलले  निकटस्थहरुसँग खोलेका छन् । सहसचिव पौडेलले जेठको तेस्रो साता मन्त्री शर्माका नातेदारकोमा गाडी उपहार पुगे पनि, खोजी गरेरपत्रकारहरुले  समाचार लेख्न नसकेको तिक्तता पनि पोख्दै हिंडेका छन् ।