ओलीको कटाक्षः एमाले जत्रो भए प्रचण्डले मान्छे कुट्दै हिंड्थे

काठमाडौं । स्थानीय तहको निर्वाचनको एक महिनासम्म चुप जस्तै रहेका नेकपा(एमाले)का अध्यक्ष केपी शर्मा ओली बिपक्षी बिशेषगरी नेकपा माओवादीप्रति पुनः खनिन थालेका छन् । चुनावमा विपक्षी गठबन्धन आंशिक हुँदा पनि एमालेले २०७४ को तुलनामा १ सय सिट हाराहारी पराजय ब्यहोर्नुपरेको पीडा उनले माओवादीप्रति पोख्न थालेका छन् । 

नेकपा एमालेले ७५२ पालिका (बुढीगंगा नगरपालिकाबाहेक) मा २०५ पालिका प्रमुख जितेको नतिजा आइसक्दा ओलीले एमाले नै मुलुकको सबभन्दा ठूलो दल भएको दाबी गरेका छन् । ओलीले शुक्रबार एमाले मोरङले निर्वाचित जनप्रतिनिधिलाई बधाइ दिन आयोजना गरेको कार्यक्रममा  कांग्रेस, माओवादी लगायतका दलहरूले एमालेसँग प्रतिस्पर्धा गर्न नसक्ने बताएका छन् । 

माओवादी अध्यक्ष पुष्पकमल दाहाल ‘प्रचण्ड’तिर संकेत गर्दैै ओलीले भने–‘अस्ति एक जनाले भनेको सुन्दैथें’, ‘हामीले चाह्यौं भने कांग्रेसको हालत पनि एमालेको जस्तै बनाइदिन्छौं ।’ एमालेको हालत बनाउने भनेको के हो ? एमालेको हालत बनाइदिन्छु भन्नेको हैसियत जम्मा कम्मर–कम्मर होइन ?’ 

‘कम्मर कम्मर पनि होइन । घुँडा घुँडासम्मको पार्टीले एमालेको हालत बनाउने रे † आफू एमालेजत्रो हुन पाए उनले के गर्थे होलान् ? मान्छे कुट्दै हिँड्थे होला । पहिले मान्छे मार्दै हिँडेका थे ।’

चुनावअघि यसैगरी अरु दललाई गाली गर्न ओली जुम्लासम्म पुगेका थिए । उनले चुनावअघि प्रचण्डदेखि नेकपा समाजवादीका अध्यक्ष माधवकुमार नेपालसम्मलाई कटाक्ष गरे । तर चुनावमा उनले जहाँ जहाँ विपक्षी दलहरुप्रति कटाक्ष गरेका थिए, त्यहाँ त्यहाँ एमाले पराजीत भएको थियो ।