जनता कोरोनाको त्रासमा, मन्त्री–सचिव सरुवादेखि समायोजन उल्टाउँदै घुस असुलीमा

हृदयेश त्रिपाठी र सूर्यप्रसाद गौतम

काठमाडौं । केपी शर्मा ओलीले हृदयेश त्रिपाठीलाई संघीय मामिला तथा सामान्य प्रशासन मन्त्रालयको जिम्मा दिएपछि उनले त्यहाँ गाईजात्रा मच्चाउन सुरु गरेका छन् । कोरोना महामारीका बीचमा उनले साढे ४ करोड रुपैयाँमा गाडी खरिद गर्न लागेको बिषयमा सामाजिक संजालमा चर्को आलोचना भइरहेको छ । उनले मन्त्रालय वा अन्तर्गतका ९ वटा गाडी दुरुपयोग गरेको बिषयले सरकारलाई बदनाम गराएको छ । सत्ताको दुरुपयोगको उदाहरण मन्त्री त्रिपाठीले प्रदर्शन गरेका छन् ।

कोरोना महामारीका कारण राजस्व संकलन नै ठप्प भए पनि मन्त्री त्रिपाठीले साढे ४ करोडको गाडी खरिद गर्नु र सचिव सूर्यप्रसाद गौतमले आफ्नै कार्यकक्षमा ६ लाखको सोफा र फर्निचर फेरेका समाचार सार्वजनिक भइरहेका छन् । अर्थमन्त्रालयले २०७६ चैत २० मा फर्निचर खरिद लगायतका कार्य नगर्न गरेको परिपत्र बिपरीत सचिव गौतमले आफ्नो र सहसचिवहरुको कार्यकक्षमा करोडको हाराहारीमा सोफादेखि कार्पेट फेरेका छन् ।

मन्त्री त्रिपाठीले कर्मचारी सरुवामा दाम असुलीलाई रफ्तारका साथ अगाडि बढाएका छन् । विशेषगरी तराईका जिल्लाहरुमा सरकारले खटाएका प्रमुख प्रशासकीय अधिकृतहरुलाई कामै गर्न नदिने र त्यहीँका स्वास्थ्य, शिक्षा, पशु कार्यालयका कर्मचारीलाई कामु प्रशासकीय अधिकृतको जिम्मा दिएर ब्रम्हलुट गर्ने क्रम बढेको छ । जुन काम मन्त्री त्रिपाठीकै स्वकीय सचिवालयका कर्मचारीबाट हुँदैआएको छ । मन्त्री त्रिपाठी र सचिव गौतमले लकडाउनको अवधिमा सरुवामा लिलाम बढाबढ गरी घुस असुली गरेको आरोप छ ।

सरुवाले मात्र नपुगेर विगतमा समायोजन ऐन अनुसार समायोजन भएका कर्मचारीको समायोजन नै उल्टाउने काम पनि हुँदैआएको छ । राजस्व समूहका १४ उपसचिवहरुलाई प्रदेशमा भएको समायोजन बदर गर्ने खेलमा घुसमा कुरा मिलाइसकेका मन्त्री त्रिपाठीले उक्त निर्णय गर्न मुख्यसचिव लोकदर्शन रेग्मीले रोकेकाले तिल्मिलाएका छन् ।

सातै प्रदेशमा समायोजन भएका राजस्व समूहका उपसचिवहरु विगतमा कर र राजस्व समूहमा बसी अकूत सम्पत्ति आर्जन गरेकाहरु नै छन् । उनीहरु जे जसरी हुन्छ समायोजन बदर गराएर संघमै दरबन्दी कायम गराउन भगीरथ प्रयत्नमा छन् । त्यसका लागि राजस्व समूहका उपसचिवद्वय जनार्दन पौडेल र राजेन्द्रप्रसाद चुडाल सक्रिय रुपमा लागेका छन् । मन्त्री त्रिपाठीको अर्थमोहबारे जानकारी पाएका उनीहरु प्रतिब्यक्ति ५ लाखको अफर गरी समायोजन बदर गराउन लागेका छन् । झापा घर भएका चुडाल प्रधानमन्त्री केपी शर्मा ओलीकोमा समेत पुगेर समायोजन बदर गराउन लागेका छन् । उनी ओलीलाई बा को साइनो समेत लगाएर जसरी हुन्छ समायोजन बदर गराउने चलखेलमा छन् । चुडाल प्रदेशमा सरुवा भए पनि सर्वोच्च अदालतमा मुद्दा दायर गरी भन्सार विभागको आकर्षक प्रोजेक्टका रुपमा लिइने सिंगल विन्डो सिस्टममा गाडी सुविधा सहित कार्यरत छन् ।

यसैबीच, मन्त्री त्रिपाठीले अघिल्लो सरकारले ऐन अनुसार गरेका समायोजन गरेका कर्मचारीको समायोजन उल्टाउन तल्लीन छन् । उनले पहिलो चरणमा १५ कर्मचारीको समयोजन संशोधन भन्दै उल्ट्याएका छन् । यसरी समायोजन संशोधन गरिएकाहरुमा खरिदारदेखि अधिकृतसम्मसम्म छन् । पूर्वाधार विकास कार्यालय रुकुमका सब इन्जिनियर विश्राम पुन मगरलाई कर्णाली प्रदेश गरिएको समायोजन संशोधन गरिएको छ । यातायात व्यवस्था कार्यालय सगरमाथा सिराहाबाट प्रदेश १ मा समायोजन गरिएका अधिकृत (छैटौं) यमनाथ बरालको समायोजन उल्टयाइएको छ ।

जिल्ला प्रशासन कार्यालय सुनसरीका अधिकृत कुमार न्यौपाने, प्रदेश योजना कार्यालय विराटनगरकी नायब सुब्बा उमा बन्जाराको समायोजन संशोधन भएको छ । उनीहरुलाई प्रदेश १ मा समायोजन गरिएको थियो ।

हेटौंडा उपमहानगरपालिका मकवानपुरका नासु जय राम रुपाखेतीको बागमती प्रदेशमा गरिएको समायोजन सच्याइएको छ ।

मायादेवी गाउँपालिका, कपिलवस्तुका नासुलाई सोही गाउँपालिकामा समायोजन गरिएको थियो । त्यो पनि उल्टइएको छ । उमाकुण्ड गाउँपालिका रामेछापका खरिदार केशरबहादुर खत्रीको समायोजन संशोधन गरिएका मन्त्रालयले जनाएको छ ।

उनलाई उमाकुण्ड गाउँपालिकामा नै समायोजन गरिएको थियो । सान्नी त्रिवेणी गाउँपालिका कालिकोटका खरिदार प्रकाशकुमार केसीको बैजनाथ गाउँपालिका बाँकेमा समायोजन गरिएको थियो । अन्नपूर्ण पोष्ट दैनिकका अनुसार मेचीनगर नगरपालिका, झापाका खरिदार राजेन्द्र प्याकुरेललाई सोही नगरपालिकामा समायोजन गरिएको थियो ।

उनको समायोजन पनि संशोधन भएको छ । मालपोत कार्यालय सक्रान्तीबजार, तेह्रथुमका खरिदार सन्दिप न्यौपानेलाई प्रदेश १ मा समायोजन गरिएको थियो। त्यो पनि उल्टाइएको छ ।

क्षेत्रीय स्वास्थ्य निर्देशनालय, धनकुटा (फाजिल) पम्प मेकानिक रामप्रसाद पराजुलीको विराटनगर महानगरपालिका मोरङमा समायोजन भएको थियो । फेरि उनलाई फाजिलमा नै राखिएको छ । यातायात व्यवस्था कार्यालय ललितपुर (फाजिल) टाइपिस्ट नासु रबिन्द्र श्रेष्ठ चन्द्रागिरी नगरपालिका, काठमाडौमा समायोजन गरिएको थियो।पुन स् टाइपिस्ट श्रेष्ठलाई फाजिलमा नै राखिएको छ ।

यातायात व्यवस्था कार्यालय, नारायणी पर्साका खरिदार प्रविण गुरागाईलाई प्रदेश १ मा गरिएको समायोजन पनि संशोधन भएको छ ।

तिरहुत गाउँपिलका सप्तरी सब इन्जिनियर जागेश्वर मण्डलको सोही गाउँपिलकामा भएको समायोजन पनि संशोधन भएको छ । सहिदभुमि गाउँपालिका धनकुटाकी सहायक महिला विकास निरीक्षक चन्द्रकला पाण्डेको धनकुटा नगरपालिकामा भएको समायोजन पनि सच्याइएको छ ।