खतरालाई मध्यनजर गर्दै प्रचण्डको सुरक्षामा थपिए दर्जनौं सुरक्षाकर्मी

काठमाडौँ । प्रहरी प्रधान कार्यालयले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को सुरक्षा खतरालाई ध्यानमा राख्दै  थप सुरक्षाकर्मीको व्यवस्था गरेको छ । 

प्रचण्डको  व्यक्तिगत सुरक्षा अधिकृत-पीएसओमा फेरि नाबय उपरीक्षक-डीएसपी खटाइएकाे छ । केही समय अघि फिर्ता बोलाइएका डीएसपी विनोद घिमिरेलाई फेरि प्रचण्डको पीएसओको रुपमा खटाइएको हो ।

गृह मन्त्रालयले केही समय अघि विशिष्ट व्यक्तिको सुरक्षा सम्बन्धी मापदण्ड परिमार्जन गरि पूर्व प्रधानमन्त्रीलाई १६ जना सशस्त्र प्रहरी र दुई जना नेपाल प्रहरी दिने व्यवस्था गरेको थियो ।

शेरबहादुर देउवा प्रधानमन्त्री भएपछि प्रचण्डको सुरक्षामा खटिने सुरक्षाकर्मी बढाउँदै पीएसओका रुपमा डीएसपीलाई पठाइएको छ । माधव कुमार नेपाललगायतका नेताको सुरक्षामा पनि सुरक्षाकर्मी बढाइएका छन् ।

नेपाल प्रहरीका प्रवक्ता बसन्त कुँवरले सुरक्षा खतरालाई ध्यान दिएर सुरक्षाकर्मीको संख्या थपघट हुनु स्वभाविक भएको बताए ।