एमालेको केन्द्रीय समिति बैठक सुरु, देउवालाई भोट दिएका नेपाल पक्षका सांसदबारे कस्तो निर्णय आउला ?

काठमाडौं । नेकपा एमालेको १० औं केन्द्रीय समिति बैठक ललितपुरस्थित तुलसीलाल आमात्य प्रतिष्ठानमा सुरु भएको छ ।

जारी बैठकमा पार्टीको विधान अधिवेशन, पार्टीको ह्वीप उलङ्घन गर्ने नेतामाथिको कारवाही लगायतका विषयमा छलफल हुने नेताहरुले बताएका छन् । 

बैठकमा वरिष्ठ नेता माधवकुमार नेपाल पक्षका नेताहरु भने सहभागी भएका छैनन् ।

कार्यदलबीच भएको १० बुँदे सहमति कार्यान्वयन गर्नै अध्यक्ष केपी शर्मा ओलीले आज २०७५ जेठ २ अघिको केन्द्रीय कमिटी बैठक राखेका हुन् । 

नेपाल समूह उपस्थित नभए पनि उसको मागअनुसार आज १०औँ केन्द्रीय कमिटी बैठक राखिएको हो । आइतबार कांग्रेस सभापति शेरबहादुर देउवा सरकारलाई पार्टीको निर्णय विपरीत नेपाल समूहका सांसदहरुले विश्वासको मत दिएका छन् ।

साथै ओली समूहकै सांसदहरुले विश्वासको मत दिएका छन् । यसबारे जारी बैठकमा छलफल हुने नेताहरुले जानकारी दिएका छन् । 

अदालतले कारबाही गर्न नमिल्ने बताइए पनि एमालेले पार्टी निर्णय विपरीत विश्वासको मत दिने सांसदकाबारेमा कस्तो निर्णय लेला भन्ने आमचासो बढेको छ ।