सर्वोच्चकाे फैसलालाई जित-हारको रूपमा नलिन कांग्रेसको आग्रह

काठमाडाैं । प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गरेको प्रतिनिधिसभा विघटनलाई असंवैधानिक ठहर गर्दै सर्वोच्च अदालतले बदर गरेको फैसलालाई नेपाली कांग्रेसले स्वागत गरेकाे छ ।

साेमबार विज्ञप्ति जारी गर्दै कांग्रेस सभापति शेरबहादुर देउवाले सर्वोच्चकाे याे फैसलाले लिक बाहिर धकेलिएकाे संविधानलाई ट्रयाकमा ल्याएकाे र स्वतन्त्र न्ययपालिकाप्रतिकाे अास्था र विश्वासलाई अभिवृद्धि गरेकाे बताउँदै फैसलाकाे स्वागत गरेका हुन् ।

विज्ञप्तिमा भनिएकाे छ- ‘लाेकतन्त्र र लाेकतान्त्रिक संविधान रक्षाकालागि विभिन्न ढंगले अान्दाेलनमा सरिक राजनैतिक दलहरू, सबै कानून व्यवसायीहरू, भातृ र शुभेच्छुक संस्थाहरू लगाएत सम्पूर्ण नेपालीहरूलाई बधाइ ज्ञापन गर्दछु ।’

उनले देश र जनताको हितमा संयम र एकताका साथ समर्पित भएर कार्य गर्न फैसलाले अझै जिम्मेवार बनाएको उल्लेख गरेका छन् । 

कसैले पनि यसलाई ब्यक्तिगत जीत हारको बिषयका रूपमा नलिई लोकतन्त्र, लोकतान्त्रिक संविधान अनि समग्रमा देश र जनताको हितमा उपयोग गरेर जानुपर्दछ भन्ने अपील र आग्रह पनि म गर्न चाहन्छु,’ देउवाले भनेका छन् ।