योगेश भट्टराईद्वारा एमालेको एकता बचाउन आह्वान, अदालतको फैसलाको स्वागत

काठमाडौं । सर्वोच्च अदालतको संबैधानिक इजलासले प्रतिनिधिसभाको पुनस्र्थापना गरी नेपाली कांग्रेसका सभापति शेरबहादुर देउवालाई प्रधानमन्त्री नियुक्त गर्न परमादेश दिएपछि विपक्षी गठबन्धनमा खुसियाली छाएको छ भने सत्तारुढ दल एमालेको केपी ओली समूहमा निराशा छाएको छ । त्यही निराशाको अभिब्यक्ति महेश बस्नेतहरुले सडकमा पोख्न थालिसकेका छन् ।

अदालतको आदेश बिरुद्ध महेश बस्नेतले सार्वजनिक रुपमै सडकमा उत्रन कार्यकर्तालाई निर्देशन दिएका छन् । अदालतको आदेशबिरुद्ध नाराबाजी गर्न उक्साउने र बस्नेत आफैं समेत सडकमा बिरोध प्रदर्शनमा उत्रिएका छन् ।  महेश बस्नेतहरु सडकमा अदालतको आदेश बिरुद्ध नाराबाजीमा उत्रिरहँदा एमालेका नेता योगेश भट्टराईले प्रतिनिधिसभा पुनस्र्थापनाको स्वागत गरेका छन् ।

अदालतको आदेशको स्वागत गर्दै नेता भट्टराईले एमालेको एकता जोगाउन सबैमा अपिल गरेका छन् । भट्टराईले लेखेका छन्–‘सर्वोच्च अदालतको संबैधानिक बेन्चद्वारा प्रतिनिधिसभाको पुनःस्थापना पुनस्थापना गर्ने गरी गरेको आदेशको सम्मान र स्वागत गर्दछु । बदलिएको परिस्थितिमा प्रतिनिधिसभाको बाँकी कार्यकालको सुनिश्चिततासहित नेकपा एमालेको एकतालाई जोगाउन एमालेका समस्त नेता र कार्यकर्ता कमरेडहरुमा संयम र धैर्यताका साथ अघि बढ्न आह्वान गर्दछु । हिजो भएको १० बँुदे सहमतिलाई इमान्दारिताकासाथ कार्यान्वयन गर्दै नेकपा एमालेलाई संसदभित्र र बाहिर पनि एकढिक्का रहनेछ भन्ने बिश्वास ब्यक्त गर्दछु ।’

योगेश भट्टराई एमालेको एकताका लागि लामो समयदेखि लाग्दैआएका छन् । देउवालाई प्रधानमन्त्री बनाउनका लागि पनि १४६ सांसदले हस्ताक्षर गर्दा उनले पार्टी एकताकै खातिर गरेका थिएनन् । एमालेको विवाद समाधान कार्यदलले आइतबार राति १०.३० बजे गरेको १० बुँदे सहमतिपछि अनुमोदन नहुँदै सर्वोच्चले देउवालाई प्रधानमन्त्री नियुक्त गर्न परमादेश दिएको छ ।