पार्टी अवैधानिक भएको भन्दै बादल समूहले माओवादी केन्द्रविरुद्ध उजुरी दिने

काठमाडौं । माओवादी छाडेर नेकपा एमालेमा लागेका नेताहरुले नेकपा माओवादी केन्द्रविरूद्ध उजुरी दिने भएका छन् । 

उनीहरुले बुधबार दिउँसो साढे १२ बजे निर्वाचन आयोगमा निवेदन बुझाउन जाने तयारी गरेका छन् ।

२०७१ सालदेखि महाधिवेशन नगरेको र पार्टी एकतापछि आयोगमा दर्ता पनि नभएकाले पार्टी अवैधानिक भएको भन्दै रामबहादुर थापा ‘बादल’ समूहले आयोगमा उजुरी दिन लागेका हुन् ।

सर्वोच्च अदालतले २३ फागुनमा साबिकको नेपाल कम्युनिस्ट पार्टी (नेकपा) को एकता खारेज गरेपछि नेकपा एमालेतिर लागेका कारण तत्कालील प्रतिनिधिसभा सदस्य टोपबहादुर रायमाझी, लेखराज भट्ट, प्रभु साह र गौरीशंकर चौधरी तथा राष्ट्रियसभा सदस्य रामबहादुर थापा बादललाई कारबाही गरेको थियो ।

अवैधानिक पार्टीले गरेको कारबाहीका कारण जनताबाट निर्वाचित आफूहरुको पद गएको भन्दै उनीहरुले गुनासो समेत गरेका छन् ।