माधव नेपाल समूह छाडेको पुरस्कार, श्रीमती प्रदेशमा सामाजिक मन्त्री, श्रीमान संघमा स्वास्थ्य मन्त्री

काठमाडौैं । प्रधानमन्त्री केपी शर्मा ओलीले माधव नेपाल र झलनाथ खनाल समुह छाडेबापत सिन्धुपाल्चोकका शेरबहादुर तामाङलाई संघीय सरकारमा स्वास्थ्य मन्त्रीब बनाएका छन् । तामाङकी श्रीमती उषाकला राई प्रदेश नम्बर १ को सामाजिक विकास मन्त्री नियुक्त भइसकेकी छन् । प्रदेश नम्बर १ का मुख्यमन्त्री शेरधन राईले गएको चैत १३ मा राईलाई मन्त्रीमा नियुक्त गरेका थिए ।

नेकपामा विवाद हुँदा तामाङ र राई जोईपोई नै माधव नेपालको साथमा थिए । नेकपाको एकता खारेजीसँगै तामाङ ओलीतिर लागे । तर राई भने माधव नेपाल समूहमै थिइन् । तर पछि दुवै जना ओलीतिर लागे । र, श्रीमान श्रीमती नै मन्त्री हुने भाग्यमानी जोडी भएका छन् ।

प्रधानमन्त्री ओलीले पटक पटक चुनाव जितेका विशाल भट्टराई, कृष्णप्रसाद दाहालजस्ता आफ्नै सांसद र पछिल्लो समयमा माधव नेपाल समुह छाडेर आएका कृष्णभक्त पोखरेललाई पनि मन्त्री नबनाई तामाङलाई संघमा र उनकी श्रीमतीलाई प्रदेशमा मौका दिएका छन् । 

ओलीको सरकार गठन हुनासाथ २०७४ चैतमा तामाङ कानुन मन्त्री भएका थिए । तर बंगलादेशमा एमबीबीएस अध्ययन गर्न जाने नेपाली विद्यार्थीहरुको बारेमा विवादास्पद अभिब्यक्ति दिएका कारण उनको बिरोध भयो । र, उनले रुदै पदबाट राजीनामा दिएका थिए । प्रधानमन्त्री ओलीका निकट कानुनी क्षेत्रका सर्वेसर्वा ठान्ने सुवास नेम्वाङ, अग्नि खरेलहरुको उक्साहटमा ओलीले तामाङलाई राजीनामा दिन निर्देशन दिएका थिए ।