ओलीको निरंशुकता रोक्न पनि सामूहिक राजीनामा दिन्छाैं: भीम रावल

काठमाडौं । नेकपा (एमाले) का नेता भीम रावलले आफू सामूहिक राजीनामा दिनुपर्ने पक्षमा उभिएको बताएका छन् ।  

उनले अब आफूहरु अध्यक्ष ओलीसँग सम्झौता गर्ने पक्षमा नरहेको भन्दै तत्काल सामूहिक राजीनामा दिएर एउटा निकास दिने विश्वास दिलाएका छन् ।

ओलीलाई परास्त गर्नुको विकल्प नभएको पनि टिप्पणी गर्दै रावलले भनेका छन् उहाँले संविधान र उपलब्धि नै समाप्त पार्ने षड्यन्त्र गर्नुभएको छ । अब हामी यत्तिकै बसेर हुँदैन् । ओलीको निरंशुकता रोक्न पनि यो कदम उपयुक्त हो । राजीनामा दिनु निकास हो ।

राष्ट्रपति विद्यादेवी भण्डारीले धारा ७६ को २ अनुसार नयाँ सरकार गठनको लागि दलहरुलाई आह्वान गरेसँगै नेपाली कांग्रेसका सभापति शेरबहादुर देउवाले आफ्नो नेतृत्वमा सरकार बनाउनको लागि पहल लिएका छन् ।

कांग्रेस, माओवादी केन्द्र र जसपाको उपेन्द्र यादवको साथ लिएर देउवा सरकार गठनको अन्तिम गृहकार्यमा जुटेका छन् ।

देउवालाई जसपाको बहुमत सांसदको सहयोग रहने विश्वास गरिएको छ ।  एमालेको माधव नेपाल पक्षले पनि देउवालाई नयाँ सरकार गठनको लागि सघाउने वचन दिएको छ ।

उनीहरुले सरकार गठनको लागि सघाउने भन्दै २० जना सांसदले राजीनामा दिने वचन दिएका छन् । नेपाल पक्षका सबै सांसदहरुले राजीनामा दिने पत्रमा हस्ताक्षर गरेर नेता नेपाललाई बुझाईसकेका छन् ।