सरकार उद्घाटन र शिलान्यासमा लिप्त हुँदा कोरोना फैलिएको सभापति देउवाको दाबी

काठमाडौँ। नेपाली कांग्रेसका सभापति एवं पूर्वप्रधानमन्त्री शेरबहादुर देउवाले सरकारले कोरोना भाइरस संक्रमण नियन्त्रणमा गल्ती गरेको भन्दै सरकारले नै कोरोना फैलाएको आरोप लगाएका छन्।

आज आफनै निवास बूढानिलकण्ठमा आयोजित पत्रकार सम्मेलन गरेर सभापति देउवाले सरकारले विगतका गल्तीबाट पाठ नसिकेको र कसैका सल्लाह पनि नमानेको भन्दै सरकारको चरम लापरवाही र असंवेदनशीलताले गर्दा यस्तो भएको बताएका हुन्। 

देशमा कोरोना सङ्क्रमण व्यापक रूपमा बढेको भन्दै आवश्यक आइसियु बेड र भेन्टिलेटरको तत्काल व्यवस्था मिलाउन सरकारलाई आग्रह गर्दै पुर्वप्रधानमन्त्री समेत रहेका देउवाले भने, ‘केपी शर्मा ओली नेतृत्वको सरकारले कोरोना संक्रमण रोक्न कुनै ठोस कदम नचाल्दा दोस्रो पटक लकडाउन गर्ने स्थिति आइपुगेको छ। देउवाले भने,’अधुरा कामलाई नै पूरा भएको भन्दै उद्घाटन, शिलान्यास, भिडभाड र तडक—भडकमा लिप्त ओली सरकारले संक्रमण रोक्ने कुनै ठोस काम नगरेकोले फेरि लकडाउन गर्ने स्थितिमा पुगेको छ।’

उपत्यका लगायत ठूला सहरहरूमा सरकारले लकडाउन गरेर लाखौं मान्छेलाई परीक्षण नै नगरी गाउँ फर्काएको भन्दै संक्रमण अझै बढ्ने देउवाको भनाइ छ ।

यस्तै, सभापति  देउवाले खोपको आपूर्तिका लागि व्यवस्था गर्ने तर्फ तत्काल पहल गर्नसमेत सरकारलाई सुझाएका छन् । लकडाउनका कारण आर्थिक सामाजिक रूपमा मारमा परेकाहरूका लागि आवश्यक कार्य योजना ल्याउनसमेत देउवाले सरकारको ध्यानाकर्षण गराएका छन् ।