सुनकोशी–मरिण ठेक्का प्रकरणः सिंचाई बिभागका महानिर्देशक र आयोजना प्रमुख पक्राउ

काठमाडौं । प्रधानमन्त्री कार्यालयको निर्देशनमा जलस्रोत तथा सिँचाइ विभागका महानिर्देशक दिनेश रजौरिया र सुनकोसी मरिण डाइभर्सन आयोजनाका निर्देशक कृष्णप्रसाद रिजाललाई प्रहरीले नियन्त्रणमा लिएको छ ।

राष्ट्रिय गौरवको सुनकोशी–मरिण आयोजनाको ठेक्का प्रक्रियाका बिषयमा महानिर्देशक रजौरे र आयोजना प्रमुख रिजाललाई प्रधानमन्त्री कार्यालयले नियन्त्रणमा लिन निर्देशन दिएपछि बिहीबार प्रहरीले पक्राउ गरी काठमाडौं ल्याएको हो ।

सुनकोशी–मरिण आयोजना नयाँ ठेक्का प्रक्रियामा तीन चिनियाँ कम्पनी योग्य ठहरिएका छन् । ती कम्पनीको आर्थिक प्रस्ताव कात्तिक १६ गते खोल्ने मिति तय गरिएको थियो । तर ठेक्काको आर्थिक प्रस्ताव खोल्नुअघि नै महानिर्देशक रजौरिया र आयोजना प्रमुख रिजाल पक्राउ परेका छन् ।

प्रहरीले बिहीबार रजौरियालाई सिरहाको लहान र रिजाललाई सिन्धुलीबाट पक्राउ गरी काठमाडौँ पठाएको थियो । प्रहरी स्रोतका अनुसार दुवैलाई सिंहदरबारस्थित प्रधानमन्त्री कार्यालयमा राखिएको छ ।

राष्ट्रिय गौरवको उक्त आयोजनाको ठेक्का एकपटक रद्द भएपछि पुनः प्रक्रिया अघि बढाइएको थियो ।

अनुसन्धानका लागि भन्दै उनलाई पक्राउ गरिएको प्रहरी श्रोतले जनाएको छ । तर कुन मुद्दामा पक्राउ गरिएको भन्ने प्रहरीले जानकारी दिएको छैन ।

सुनकोशी मरिण डाईभर्सनको आगामी सोमबार खुल्ने हेडवर्क निर्माण र विद्युत गृह निर्माणको लागि आर्थिक टेण्डर खुल्ने मिति तय भएको थियो । सोही टेण्डरमा दवाव दिन टेण्डरको पूर्वसन्ध्यामा उनलाई पक्राउ गरिएको हुनसक्ने आँकलन गरिएको छ । तथापि स्पष्ट कारण खुल्न सकेको छैन ।