शेखर कोइरालाकै निर्देशनमा मोरङमा आक्रमण भयो : सहमहामन्त्री डिला संग्रौला

काठमाडौँ । नेपाली काङ्ग्रेसकी केन्द्रीय सहमहामन्त्री डा. डिला सङ्ग्रौलाले आफूमाथि भएको साङ्घातिक आक्रमण नेता डा. शेखर कोइरालाकै योजना र निर्देशनमा भएको गम्भीर आरोप लगाएकी छन् ।

नेपाली रेडियो नेटवर्कको चर्चित कार्यक्रम ‘नेपाली बहस’ मा नेतृ सङ्ग्रौलाले महाधिवेशन बिथोल्ने योजनाबद्ध षड्यन्त्रअन्तर्गत आफ्नै पार्टीका नेताबाट आपराधिक कृत्य गराइएको दाबी गरेकी हुन् ।

नेपाली काँग्रेसको महाधिवेशन अन्तर्गत देशभरी शान्तिपूर्णरुपमा अधिवेशन भइरहेका बेला अधिवेशनको विरोध गर्दै आएको कोइरालको निर्वाचन क्षेत्रमा भने रगताम्य घटना भएको हो ।

सङ्ग्रौलाका अनुसार अधिवेशनमा सहभागी नहुन कार्यकर्तालाई उर्दी जारी गर्ने, यसअघिदेखि नै हरेक वडा–वडामा पुगेर अधिवेशन भाँड्ने गतिविधि गर्ने र प्रक्रिया नै विथोल्ने प्रयास शेखर कोइराला समूहबाट निरन्तर भइरहेको थियो । सोही शृङ्खलाको उत्कर्षका रूपमा आफूमाथि आक्रमण गराइएको उनको भनाइ छ ।

आक्रमणको अघिल्लो रातको योजनाबारे खुलासा गर्दै नेतृ सङ्ग्रौलाले भनिन्–क्षेत्रीय सभापति देवराज तामाङको घरमा राति ११ बजेसम्म बसेर योजना बनाइएको थियो । मलाई त्यसबारे पूर्वजानकारी नभएको पनि होइन, तर पार्टीप्रति भरोसा भएकाले र लोकतन्त्रमा विमतिहरूलाई संवादमार्फत नै समाधान गर्नुपर्छ भन्ने मान्यताका साथ म त्यहाँ पुगेकी थिएँ ।’

कार्यक्रमस्थल पुगेको १५ मिनेटमै आफूमाथि सुनियोजित रूपमा आक्रमण सुरु भएको पीडा उनले सुनाइन् । ‘मदिरा सेवन गरेका र हतियार बोकेका व्यक्तिहरूले क्षेत्रीय सभापतिकै नेतृत्वमा ममाथि आक्रमण गरे । त्यहाँ उपस्थित उहाँ (शेखर) निकटका मान्छेहरू भने चुपचाप रमिता हेरेर बसिरहे’– सङ्ग्रौलाले आक्रोश व्यक्त गरिन् ।

बुधबार सुन्दरहरैचामा आयोजित अधिवेशनमा भएको घटनामा परी नेपाली कांग्रेसका क्षेत्रीय कार्यवाहक सभापति चुमनारायण तबदार र नेता चेतराज रेग्मीलगायतका कार्यकर्ता घाइते भएका छन् । उनीहरूको नोबेल मेडिकल कलेजमा उपचार भइरहेको छ ।

पार्टीको १५औँ महाधिवेशनअन्तर्गत देशभर उत्साहका साथ अधिवेशनहरू भइरहँदा जिम्मेवार नेताकै आडमा भएको यस्तो हिंसात्मक र आपराधिक घटनाले लोकतान्त्रिक मूल्यमान्यताको धज्जी उडाएको भन्दै उनले दोषीमाथि कडा कारबाही हुनुपर्ने माग गरिन् । लोकतान्त्रिक प्रतिस्पर्धालाई पाखुराको बल र हतियारले दबाउन खोज्ने प्रवृत्ति काङ्ग्रेसभित्र कुनै पनि हालतमा स्वीकार्य हुन नसक्ने उनको अडान थियो ।