नेपाल लाईफ इन्स्योरेन्सले बीमितलाई ठग्ने र अभिकर्तामाथि ज्यादती गरेको संघको आरोप

काठमाडौ । नेपाल राष्ट्रिय बीमा अभिकर्ता संघले नेपाल बीमा प्रधिरकरण र बीमा कम्पनीहरुको मिलेमतोमा लाखौं बीमितलाई ठगि गर्ने गरेको खुलासा गरेको छ ।

बिहीबार राजधानीको संवाद डबलीमा पत्रकार सम्मेलनको आयोजना गरी नेपाल लाईफ इन्स्योरेन्स कम्पनीले सबैभन्दा बढी ठगी गर्ने गरेकोे अरोपसमेत लगाएको छ ।

संघका अध्यक्ष राजेन्द्र अमात्यले बीमा कम्पनीहरुले लाखौं बीमितलाई ठगी गरिरहेको खुलासा गरेका छन । बीमितलाई बिमाङ्क दोब्बर दिने भनेर निकै कम रकम भुक्तानी गर्ने गरेको तथा प्रति वर्ष प्रतिहजार ६५ रुपैयाँ बोनस दिने भनेर ३७ मात्रै दिने गरेको अमात्यले जानकारी दिए ।

विगतमा सोको विरुद्धमा अभिकर्ताहरुले आवाज उठाई ८ बर्षसम्म रु. ६५ बोनस कायम गर्न सफल भएको तर पछिल्ला ५ बर्षमा अभिकर्ताहरुकोबीचमा विभाजन ल्याई बोनसलाई रु ५० झारेको उनको अमात्यको कथन छ ।

कम्पनीहरुका वित्तीय प्रगतिका सुचाङक बढ्ने तर बीमितलाई दिइने बोनस बढ्नुको सट्टा घट्नुले बीमाप्रति जनसाधारणको धारणामा नकारात्मक बन्दै गएको उनले बताए ।
‘हामीले आजसम्म यो विषय बाहिर ल्याएका थिएनौं तर अब ल्याउन बाध्य भयौं किनकि अग्रणी ‘नेपाल लाईफ इन्स्योरेन्स कम्पनी’ ले धेरै बदमासी गर्न थाल्यो’ अध्यक्ष अमात्यको कथन छ ।

अमात्यले लाखौं बीमितलाई झुट्टा आस्वासन दिएर बीमा गर्न लगाउने र अवधि समाप्त भएपछि विभिन्न बहानामा अत्याधिक रकम कटाएर दिने गरेको जानकारी दिए ।
अभिकर्ताहरुले कम्पनीको ‘पोलिसी’ अनुसार बीमितलाई बीमा गर्न लगाउने हुँदा मारमा अभिकर्ता पर्ने गरेको बताए । ‘जनताको रकमलाई दुरुपयोग गरी नाफा कमाउने कम्पनी अनि समस्या जति अभिकर्ताको थाप्लो हाल्ने, कहिलेसम्म सहने’ अमात्यले प्रश्न गरे ।

आफूहरुले विभिन्न समयमा नियामक निकाय नेपाल बीमा प्राधिकरण र बीमा कम्पनीहरुलाई खबरदारी गर्दा पनि नसुनेको बरु ज्यादी बढाएको उनको आरोप छ ।
संघका महासचिव केशरबहादुर गरन्जाले नेपाल लाईफ इन्स्योरेन्सले भदौ ३ देखि ६ सम्म काठमाडौंस्थित होटल याक एन्ड यतिमा आयोजित ‘लिडरसिप एक्सिलेन्स अवार्ड’ कार्यक्रममा अभिकर्ताहरुले कम्पनीको बदनियतको विरोध गिरेपछि ज्यादति बढाएको जानकारी दिए ।

त्यहाँ कार्यरत अभिकर्ताहरूलाई दुव्र्यवहार गरिएको तथा सांगठनिक अधिकार खोज्दा पक्राउ गरिएको आरोप गरन्जाको छ । ‘६ सय उपस्थित भएको कार्यक्रममा ३ सय जना बाउन्सर किन चाहियो, तीनको खर्चको स्रोत के हो, आधिकारिक संगठनमाथि पूर्वाग्रही बन्नुपर्ने कारण के ?’ गरन्जाले प्रश्न गरे ।

वर्षभरि मेहनत गरी प्रथम बिमाशुल्क संकलनमा योगदान पु¥याएका अभिकर्ताहरूलाई सम्मानका लागि बोलाइएको कार्यक्रममा उल्टै उनीहरूमाथि दुव्र्यवहार गरेको भन्दै गरन्जाले रोष प्रकट गरे । ‘बाउन्सर लगाएर कुटपिट, लछारपछार, गल्हत्याउने मात्रै गरिएन, राज्य शक्तिको दुरुपयोग गरी प्रहरीले संघको नेपाल लाईफ अध्यक्ष कृष्णप्रसाद आचार्य र इमाडोल शाखा समिति अध्यक्ष शुभचन्द्र शाहलाई गिरफ्तार गरिनु घोर निन्दनीय कार्य हो’ गरन्जाको कथन छ ।

उनले नेपालको संविधान, प्रचलित कानुन अनुसार श्रम विभागमा विधिवत् दर्ता भएको ट्रेड युनियनका नेतृत्वलाई अपमान गरिएको आरोप लगाए ।

कार्यक्रममा एउटा संघलाई काखि च्यापरेर अर्को संघलाई उपेक्षा गरी ऐन कानुनको समेत धज्जी उडाएको गरन्जाको धारणा छ ।

अभिकर्ताहरूबीच विभाजन ल्याई बीमितको बोनस घटाउने तथा इन्स्योरेन्स कम्पनीभित्रका बेथितिविरुद्ध उठेका आवाजहरुलाई कमजोर पार्ने षड्न्त्र भएको गरन्जाको दाबी छ ।