जाजरकोट पहिरोमा परि एक जनाको मृत्यु, तीन जना बेपत्ता

काठमाडौँ। अविरल वर्षापछि जाजरकोटको भेरी नगरपालिका–२ रिसाङमा पहिरो जाँदा एक जनाको मृत्यु भएको छ।

जिल्ला प्रहरी कार्यालय जाजरकोटका प्रहरी निरीक्षक सुधीरकुमार खड्काका अनुसार रिसाङका ५२ वर्षीय केदार कार्कीको पहिरोमा परेर मृत्यु भएको हो।

पहिरोमा परेर सोही वडाका ५४ वर्षीय उमासिंह खत्री, ७० वर्षीय भीमबहादुर कार्की र ८७ वर्षीय रती खत्री बेपत्ता भएका छन्। अन्य नौ जना घाइते भएका छन्।

घाइतेमध्ये एक जनाको नेपालगञ्ज नर्सिङ अस्पताल, दुई जनाको कोहलपुर मेडिकल कलेज, तीन जनाको स्थानीय डौरीकाँडा मेडिकल सेन्टरमा उपचार भइरहेको छ। अन्य तीन जना स्वास्थ्य लाभ गरेर घर फर्केका छन्।

प्रहरीका अनुसार पहिरोको जोखिमलाई दृष्टिगत गरी सो वडाका २०० जनालाई त्रिभुवन आधारभूत विद्यालयको भवनमा स्थानान्तरण गरिएको छ। दुर्घटनास्थलमा नेपाल प्रहरी, सशस्त्र प्रहरी बल र नेपाली सेनाका जवान परिचालन भएका छन्।