टेरामक्स भ्रष्टाचार प्रकरण : मोहन बस्नेतलाई सफाइ, झा, ज्ञवाली र उप्रेती दोषी ठहर

काठमाडौं । नेपाल दूरसञ्चार प्राधिकरणको बहुचर्चित टेलिकम्युनिकेसन ट्राफिक मोनिटरिङ एन्ड फ्रड कन्ट्रोल सिस्टम (टेरामक्स) खरिद प्रकरणमा तत्कालीन संचार मन्त्री मोहनबहादुर बस्नेतलाई बिशेष अदालतले सफाइ दिएको छ ।

बस्नेतसहित १३ जनालाई बिशेषले सफाइ दिएको छ । तीन जनालाई दोषी ठहर गरेको छ । विशेष अदालतले तत्कालीन अध्यक्ष दिगम्बर झा, बोर्ड सदस्यद्वय धनराज ज्ञवाली र टीकाप्रसाद उप्रेतीलाई दोषी ठहर गरेको छ ।

विशेष अदालतका न्यायाधीश हेमन्त रावल, डिल्लीरत्न श्रेष्ठ र उमेश कोइरालाको संयुक्त इजलासले सोमबार सुनाएको फैसलाअनुसार तत्कालीन अध्यक्ष झालाई एक बर्ष कैद तथा तत्कालीन सदस्यद्वय ज्ञवाली र उप्रेतीलाई जनही ६ महिना कैद सजाय सुनाएको छ । तीनै जनालाई जनही ५० हजार रुपैयाँ जरिवानासमेत तोकिएको छ ।

अदालतले भ्रष्टाचार निवारण ऐन, २०५९ को दफा ८(१) अन्तर्गत उनीहरूलाई दोषी ठहर गर्दै सजाय निर्धारण गरेको हो । साथै, तत्कालीन अध्यक्षको हैसियतमा जिम्मेवारी सम्हालेका कारण झामाथि ऐनको दफा २४ समेत आकर्षित हुने भन्दै थप ६ महिना कैद सजाय सुनाइएको हो । यससँगै झाको कुल कैद सजाय एक वर्ष पुगेको छ ।

अदालतले टेरामक्स खरिदमा सम्झौता रकम ३ अर्ब २१ करोड ८३ लाख ७७ हजार १८२ रुपैयाँ भए पनि वास्तविक रूपमा १ अर्ब ११ करोड ६२ लाख ५२ हजार १४३ रुपैयाँ मात्रै भुक्तानी भएको उल्लेख गरेको छ ।

फैसलामा २०७८ वैशाख १४ गते सर्वोच्च अदालतको आदेशका कारण Vanrise Solutions SAL कम्पनीसँग सम्झौता गर्नुबाहेक अर्को विकल्प नरहेको, आपूर्ति भएका उपकरण तथा प्रणाली सम्झौताअनुसारकै र प्रभावकारी रहेको भन्ने प्रतिवेदनसमेत पेश भएकाले भुक्तानी भएको रकमलाई नै भ्रष्टाचारको विगो (हानीनोक्सानी) कायम गर्न नमिल्ने निष्कर्ष निकालिएको छ।

यस आधारमा अदालतले विगो नखुलेको अवस्था मानेर कैद र जरिबानाको सजाय मात्र निर्धारण गरेको हो । उक्त टेरामक्स प्रकरणमा अख्तियार दुरुपयोग अनुसन्धान आयोगले तत्कालीन सञ्चारमन्त्रीसहित १६ जनाविरुद्ध भ्रष्टाचार मुद्दा दायर गरेको थियो ।

टेरामक्स प्रकरणमा एउटा ल्यापटप ५० हजार अमेरिकी डलरमा खरिद गरिएको थियो । आजको १ अमेरिकी डलरको मूल्य नेपाली रुपैयाँ १ सय ५२ रुपैयाँले हिसाब गर्दा उक्त ल्यापटपको मूल्य ७६ लाख पर्न आउँछ ।