लुम्बिनीमा एमालेका चार मन्त्रीले दिएको राजीनामा स्वीकृत

काठमाडौँ । लुम्बिनी प्रदेश सरकारमा नेकपा एमालेको तर्फबाट सहभागी चार मन्त्रीले पदबाट दिएको राजीनामा स्वीकृत भएको छ। प्रदेश सरकारको पुनर्संरचना र मन्त्रालय संख्या घटाउने तयारीबीच मन्त्रीहरूको बहिर्गमन भएको हो।

मुख्यमन्त्री चेतनारायण आचार्य समक्ष बुधबार भौतिक पूर्वाधार विकास मन्त्री भूमिश्वर ढकाल, कृषि, भूमि व्यवस्था तथा सहकारी मन्त्री दिनेश पन्थी, स्वास्थ्य मन्त्री खेमबहादुर सारू तथा ऊर्जा, जलस्रोत तथा सिँचाइमन्त्री सीता शर्मा चौधरी ले सामूहिक रूपमा राजीनामा पेश गरेका थिए।

मुख्यमन्त्री तथा मन्त्रिपरिषद्को कार्यालयका अनुसार मुख्यमन्त्री आचार्यले उक्त राजीनामाहरू स्वीकृत गर्दै पदावधिका क्रममा मन्त्रीहरूले पुर्‍याएको योगदानप्रति धन्यवाद व्यक्त गरेका छन्।

लुम्बिनी प्रदेश सरकारले आगामी साउन १ गतेदेखि मन्त्रालयको संख्या घटाएर आठमा सीमित गर्ने निर्णय यसअघि नै गरिसकेको छ। मन्त्रालय पुनर्संरचनाको विषय प्रदेश सरकारको नीति तथा कार्यक्रममा समेत समावेश गरिएको छ।

प्रदेश सरकारको पुनर्गठन र सत्ता साझेदारीसम्बन्धी छलफल जारी रहेका बेला एमालेले आफ्ना तर्फबाट मन्त्री परिवर्तन गर्ने प्रक्रिया अघि बढाएको हो। स्रोतका अनुसार मुख्यमन्त्री आचार्य भने पदमै कायम रहनेछन् भने एमालेको कोटाबाट नयाँ मन्त्री चयनबारे आन्तरिक परामर्श भइरहेको छ।

यता सत्ता साझेदार नेपाली काँग्रेसले भने सरकारको नेतृत्व परिवर्तन हुनुपर्ने धारणा राख्दै आएको छ। दलहरूबीच भएको पूर्व सम्झौताअनुसार अब नेतृत्व आफ्नो दलले पाउनुपर्ने काँग्रेसको अडान रहेको बताइएको छ।