सप्तकोशी नदीको बीच टापुमा लुकाएको ४७५ किलो गाँजा बरामद

काठमाडौं । सप्तकोशी नदीको बीच टापुबाट सशस्त्र प्रहरीले करीव ४ सय ७५ के.जी. गाँजा बरामद गरेको छ ।

सुनसरी जिल्लाको बराहक्षेत्र नगरपालिका–६ र उदयपुर जिल्लाको बेलका नगरपालिका–८ स्थित सप्तकोशी नदीको बीच टापुमा १६ वटा बोरामा अवैध रुपले लुकाई छिपाई राखेको उक्त गाँजा सोमबार बरामद गरिएको हो ।

विशेष सूचनाको आधारमा सशस्त्र प्रहरी बल, नेपाल विपद् व्यवस्थापन वेश चतराबाट सशस्त्र प्रहरी निरीक्षक मेघराज राउत र सुरक्षा वेश रामपुरबाट सशस्त्र प्रहरी निरीक्षक राज विक्रम खड्काको कमाण्डमा खटिएको टोलीले उक्त गाँजा बरामद गरेको हो । नदीको बीच टापुमा भएको कारण सशस्त्र प्रहरीले र्‍याप बोटको प्रयोग गरी सो गाँजा नदीवारी ल्याएको थियोे ।

बरामद गाँजा आवश्यक कारवाहीको लागि सम्बन्धित निकायमा बुझाइएको सशस्त्र प्रहरी बलका प्रवक्ता डीआईजी बिष्णुप्रसाद भट्टले जारी गरेको विज्ञप्तिमा उल्लेख छ ।