बेपत्ता गोताखोरको शुक्रबार बिहानबाट खोजी शुरु

काठमाडौं । सप्तकोशी नदीमा बेपत्ता गोताखोरको शुक्रबार बिहानैबाट खोजी कार्य शुरु भएको छ ।

सप्तरी, हनुमाननगर कंकालिनी नगरपालिका–१ स्थित कोशी नदीमा मनसुनजन्य बिपद्को पूर्वतयारीस्वरुप प्रदेशस्तरीय विपद् सेमुलेशन अभ्यासको लागि सशस्त्र प्रहरी बल नेपाल नं. ६ गण सप्तरी, दन्तकाली बिशेष कार्य तालिम शिक्षालय सप्तरी र नम्वर ७ गण सिरहासहित संयुक्त टोलीद्धारा बिहीबार ०७ः४५ बजे अभ्यास शुरु भएको थियो ।

सो क्रममा दिउँसो १५ः१० बजे नं. १ श्रीअन्तु गण इलाम दरबन्दी भई दन्तकाली बिशेष कार्य तालिम शिक्षालय सप्तरीमा कार्यरत सशस्त्र प्रहरी हरदेव राजबंशी र नम्वर १३ गण पर्सा दरबन्दी भई नम्वर २ छिन्नमस्ता बाहिनी मुख्यालयमा कार्यरत सप्रज सुरज साउद कोशी नदीमा बेपत्ता भएका छन् । उनीहरुको खोजी कार्यलाइ तिब्रता दिइएको छ ।

शुक्रबार बिहान दन्तकाली बिशेष कार्य तालिम शिक्षालय सप्तरीबाट डिएसपी बिजय हमालको कमान्डमा ४ जना गोताखोरसहित ३५ जना र नं. ६ गण सप्तरीबाट बिपद् ब्यबस्थापन तालिम प्राप्त सहित डिएसपी बिपिन देसारको कमान्डमा २० जना सुरक्षा फौज परिचालन गरिएको छ ।

थप खोजी तथा उद्दारका लागि सशस्त्र प्रहरी बल नेपाल बिपद् ब्यबस्थापन तालिम शिक्षालय कुरिनटारबाट गोताखोरका अनुभवी प्रशिक्षक डिएसपी पुरुषोत्तम भन्डारीको कमान्डमा ५ जना गोताखोरलाइ बिहिबार राती १०ः४५ बजे त्यसतर्फ पठाइएको छ ।

२०६९ सालमा बंगलादेशबाट गोताखोर तालिम लिएका भन्डारी त्यसयता नेपालमा संचालित गोताखोर तालिमका प्रशिक्षक हुन् । उनले घटनास्थल, पानीको बहाव र अन्य कुरा फिल्डमा नै नहेरी भन्न नसकिने बताएका छन् । यो तालिम नभई मनसुनजन्य बिपद् उद्दारको पूर्बतयारी स्वरुप गरिएको सिमुलेसन अभ्यास हो । यस प्रकारका अभ्यास अहिले देशभरिनै भइरहेका छन् ।

बेपत्ता भएका उनीहरु दुबै जनाले २०८० र ८१ सालमा गोताखोर तालिम पूरा गरेका हुन्, त्यसपछि उद्दारका लागि विभिन्न ठाउंमा खटिएका थिए तर उनीहरु गोताखोर प्रशिक्षक होइनन् र हिजो भएको पनि प्रशिक्षण नभई ३÷४ दिनको उद्दार अभ्यास हो ।