सशस्त्र प्रहरीद्वारा गाईगोठबाट भण्डारण गरिएका अबैध कपडा बरामद

काठमाडौं । धनुषाको धनौजी–४ स्थित गाईगोठमा रहेको गोदामबाट अबैध रुपमा भण्डारण गरिएका ३ लाख बराबरका लत्ताकपडा सशस्त्र प्रहरी बलको टोलीले बरामद गरेको छ ।

सोमबार भन्सार कार्यालय जनकपुर, सशस्त्र प्रहरी बल ८ नम्बर गण र सीमा सुरक्षा गुल्म महिनाथपुर गुल्मको टोलीले छापा मारी उक्त कपडा बरामद गरेको हो ।

हेडक्वाटर धनुषाका सशस्त्र प्रहरी सहायक निरीक्षक राम बम्जनको ४ जनाको एन्टी स्क्वाड टोलीको बिशेष सूचनाका आधारमा टोली खटिएको थियो ।

भन्सार कार्यालय जनकपुर नायबसुब्बा कृष्णदेव यादव, सशस्त्र प्रहरी बल ८ नम्बर गणका इन्स्पेक्टर मुकुन्दबहादुर घर्ती, सशस्त्रको महिनाथपुर गुल्मका इन्चार्ज डीएसपी सुरेश कोइराला र नेपाल प्रहरीको इप्रका औरहीका बरिष्ठ सई धनबहादुर खड्काको नेतृत्वमा खटिएको टोलीले गाईगोठमा गोदाम गरिएको उक्त कपडा बरामद गरेको जनाइएको छ । बरामद कपडा जनकपुर भन्सार कार्यालयमा पठाइएको छ ।