लेक लागेर एक जना सगरमाथा आरोहीको मृत्यु 

काठमाडौँ। सगरमाथा आरोहणमा जाने क्रममा लेक लागेर एक आरोहीको मृत्यु भएको छ।

सोलुखुम्बुको सोलुदुधकुण्ड नगरपालिका–७ का विजय घिमिरे विश्वकर्माको लेक लागेर आइतबार मृत्यु भएको जिल्ला प्रहरी कार्यालयले जनाएको छ। सगरमाथाको पहिलो शिविर क्षेत्रमा पुगेका आरोही घिमिरे आज बिहान करिब ४ बजेतिर अचानक बिरामी परेका थिए।

उनलाई तत्काल आधारशिविरमा ल्याउन लागिएको थियो। पहिलो शिविरबाट तल ल्याउने क्रममा बाटोमै मृत्यु भएको जिल्ला प्रहरी कार्यालय, सोलुखुम्बुीका प्रहरी निरीक्षक विकास राईले जानकारी दिए।

ट्रेक नेपाल कम्पनीमार्फत आरोहणमा सहभागी घिमिरेको शव हेलिकोप्टरमार्फत लुक्ला हेलिप्याडमा ल्याइएको छ। परीक्षणका लागि त्रिवि शिक्षण अस्पताल काठमाडौँ ल्याउने तयारी भइरहेको प्रहरीले जनाएको छ।

उनी यसअघि सगरमाथाको चुचुरोमा पुगिसकेका थिए। पछिल्लो समय आरोही ‘गाइड’को रूपमा कार्यरत थिए।