ओली र लेखकको बन्दीप्रत्यक्षीकरण रिटको सुनुवाइ आज

काठमाडौं । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकले दायर गरेको बन्दीप्रत्यक्षीकरण रिटमा आज सर्वोच्च अदालतमा सुनुवाइ हुँदैछ ।

सर्वोच्चले यसअघि जारी गरेको कारण देखाउ आदेश अनुसार सरकार पक्षबाट लिखित जवाफ पेश भइसकेपछि अब मुद्दा बहसका लागि पेसीमा चढेको हो ।

सरकारले जेनजी आन्दोलनका घटनाको छानबिन गर्न गठित गौरीबहादुर कार्की आयोगको प्रतिवेदन कार्यान्वयन गर्ने निर्णय गरेपछि प्रहरी टोलीले चैत १४ गते ओली र लेखकलाई पक्राउ गरेको थियो ।

उक्त पक्राउलाई गैरकानूनी ठहर गर्दै दुवै नेताले चैत १५ गते सर्वोच्च अदालतमा बन्दीप्रत्यक्षीकरण रिट दायर गरेका थिए ।

चैत १६ गते छुट्टाछुट्टै इजलासले रिटमाथि प्रारम्भिक सुनुवाइ गर्दै सरकारका नाममा कारण देखाउ आदेश जारी गरेको थियो ।

सरकार पक्षले लिखित जवाफ बुझाइसकेकाले अब दुवै पक्षका कानुनी प्रतिनिधिबीच संवैधानिक र कानुनी बहस हुनेछ ।