ओली र लेखकलाई हिरासतमुक्त गर्न सर्वोच्चको आदेश, २६ गते रिहा हुने

काठमाडौं । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई हिरासतबाट तत्काल मुक्त गर्न सर्वोच्च अदालतले आदेश दिएको छ ।

सोमबार न्यायाधीशद्वय विनोद शर्मा र सुनिलकुमार पोखरेलको संयुक्त इजलासले बन्दी प्रत्यक्षीकरणको रिट खारेज गर्दै अब म्यादथप नगर्न आदेश दिएको छ । प्रहरीले आइतबार मात्र प्रहरीले ५ दिन म्यादथप गरेकाले सर्वोच्चको आदेश अनुसार चैत २६ गते छुट्नेछन् ।

ओलीको हकमा उनकी पत्नी राधिका शाक्य तथा लेखकको हकमा उनकी पत्नी यशोदा लेखकले दायर गरेको रिट सर्वोच्चले स्वीकार गर्दै प्रहरीको पक्राउलाई गैरकानूनी ठहर गरेको छ ।

प्रहरीले गौरीबहादुर कार्की आयोगको प्रतिवेदन कार्यान्वयनका क्रममा मन्त्रिपरिषद्को निर्णयलाई आधार बनाएर दुवै नेतालाई गत चैत १४ गते पक्राउ गरेको थियो । पक्राउपछि आवश्यक प्रक्रिया पूरा गरी काठमाडौं जिल्ला अदालतबाट पटक–पटक म्याद थप गर्दै अनुसन्धान अघि बढाइएको थियो ।

यद्यपि, बयान लिने काम सकिएपछि पनि अनुसन्धान बाँकी रहेको भन्दै आइतबार मात्रै थप ५–५ दिन म्याद थपिएको अवस्थामा सर्वोच्चले हस्तक्षेप गर्दै हिरासतलाई अवैध ठहर गरेको हो ।

गएको भदौ २३ र २४ गते भएको जेनजी आन्दोलनका क्रममा तत्कालीन प्रधानमन्त्री ओली र गृहमन्त्री लेखकले सुरक्षा व्यवस्थामा चरम लापरवाही गरेको आरोपमा प्रहरीले उनीहरूमाथि अनुसन्धान गरिरहेको छ ।

पूर्वन्यायाधीश गौरीबहादुर कार्की नेतृत्वको जाँचबुझ आयोगले गरेको सिफारिसका आधारमा प्रहरीले चैत १४ गते जरुरी पक्राउ पुर्जी जारी गर्दै दुवै नेतालाई नियन्त्रणमा लिएको थियो ।