सर्वोच्चमा न्यायाधीश नियुक्ति गर्न न्यायपरिषदको बैठक बस्दै, हतारमा निर्णय नगर्न सांसद न्यौपानेको सुझाव

काठमाडौं । सर्वोच्च अदालतमा रिक्त ६ न्यायाधीश नियुक्ति सिफारिसका लागि मंगलबार न्यायपरिषदको बैठक बोलाइएको छ । नयाँ सरकारले न्यायाधीश नियुक्ति गर्दा हतार नगरी स्वार्थ बाझिएका, कार्यक्षमतामाथि प्रश्न उठेका, निष्ठामाथि प्रश्न उठेका, योग्यता, क्षमता र अब्बलतामाथि प्रश्न उठेकालाई गर्न नहुने सुझाव रास्वपाकै सांसदले दिएका छन् ।

यस्तो सुझाव राष्ट्रिय स्वतन्त्र पार्टीका सांसद यज्ञमणि न्यौपानेले दिएका छन् । हतारमा नियुक्ति गरेर पछि पछुताउनेगरी निर्णय लिनु कदापी नहुने न्यौपानेको भनाइ छ ।
उनले नियुक्ति हुने न्यायाधीशहरूमा ५०–६० प्रतिशत उच्च अदालतबाट र४०–५० प्रतिशत बाहिरबाट नियुक्ति गर्न सुझाव दिएका छन् ।

न्यौपानेले सामाजिक संजालमार्फत् दिएको सुझावमा उल्लेख छ–‘सर्वाेच्च अदालतमा न्यायाधीश नियुक्ति आवश्यकता छ । तर हतारमा नियुक्ति गरेर पछि पछुताउनेगरी निर्णय लिनु कदापि हुँदैन । नियुक्ति हुने न्यायाधीशहरू स्वार्थ बाझिएका, कार्यक्षमतामाथि प्रश्न उठेका, निष्ठामाथि प्रश्न उठेका, योग्यता, क्षमता र अब्बलतामाथि प्रश्न उठेका हुनुहुँदैन ।

नियुक्ति पाउने न्यायाधीशहरू ले केही न केही हदसम्म लिङ्ग, समुदायको प्रतिनिधित्व गरेको झल्कनुपर्छ । नियुक्ति हुने न्यायाधीशहरूमा ५०–६०प्रतिशत उच्च अदालतबाट र ४०–५० प्रतिशत बाहिरबाट नियुक्ति गरिनुपर्दछ । नियुक्ति हुने न्यायाधीशहरू कुनै राजनीतिक दल को प्रभावमा परेका वा दलीय कोटा जस्तो देखिने अवस्थितिका हुनुहुँदैन । न्यायको अन्तिम आशाको बिन्दुमा फैसलाधिश होइन न्यायाधीश नियुक्ति हुनुपर्दछ । जस्तोसुकै संकट वा आश्वासन आउँदा पनि नझुक्ने र नचुक्ने, लोभ लालचाबाट टाढा रहेका भगवान रूपी न्यायमूर्ति नियुक्ति गर्नुपर्दछ ।