सर्लाहीको रामनगरमा उखु खेतमा भीषण आगलागी, करिब २० बिघा उखु जलेर नष्ट

सर्लाही । सर्लाहीको रामनगर गाउँपालिकामा उखु खेतमा भीषण आगलागी हुँदा करिब २० बिघा क्षेत्रफलमा लगाइएको उखु जलेर नष्ट भएको छ ।

रामनगर गाउँपालिका–१ महादेव टोलको पूर्वपट्टि रहेको खेतमा मंगलबार आगलागी भएको हो । स्थानीयका अनुसार तयारी अवस्थामा रहेको उखु खेतमा अचानक आगो फैलिँदा ठूलो क्षति भएको हो ।

स्थानीय अच्चेलाल रायले काटेको उखु खेतमा जलाइएको उखुको परालबाट आगो सल्किएको र त्यसले वरपर लगाइएको उखुमा फैलिँदा करिब २० बिघा क्षेत्रफलमा लगाइएको उखु जलेको बताइएको छ ।

घटनास्थलमा स्थानीय बासिन्दा तथा किसानहरूले आगो निभाउने प्रयास गरिरहेका छन् भने आगलागी नियन्त्रणमा ल्याउने प्रयास जारी रहेको छ ।

आगलागीबाट भएको क्षतिको विवरण संकलन भई रहेको जिल्ला प्रहरी कार्यालय सर्लाहीले बताएका छन् ।