प्रहरी कार्यालयको मन्दिर निर्माणमा समेत भ्रष्टाचार : ३ बर्षसम्म उदघाटन हुन सकेन

धनुषा । जिल्ला प्रहरी कार्यालय धनुषामा प्रवेश गर्नासाथ दुर्गा भवानीको मन्दिर हुँदाहुँदै ३ बर्षअघि अर्को मन्दिर निर्माण सुरु गरियो । जुन मन्दिरको निर्माण ३ बर्षसम्म पनि पूरा हुनसकेको छैन । १५ लाखमा निर्माण हुने मन्दिरमा ४५ लाख खर्च भइसक्दा पनि पूरा हुन सकेको छैन । १५ लाख लागतमा तयार हुनुपर्ने मन्दिर ४५ लाख खर्च भइसकेको छ । अझै थप १५ लाख भुक्तानी बाँकी रहेको छ ।

बढीमा ६ महिनामा निर्माण सकिनुपर्ने उक्त मन्दिर ३ बर्षसम्म पनि संचालनमा आउन नसक्नुको मुख्य कारण अस्वभाविक लागत भएको प्रहरी स्रोत बताउँछ । धनुषामा आउने कुनै पनि एसपी उक्त मन्दिरको लागत देखेर उदघाटन गर्न र बाँकी भुक्तानी गर्न हच्किदैआएका छन् ।

जिल्ला प्रहरी कार्यालय धनुषाको प्रांगणमा बायाँपट्टि मन्दिर पहिले नै थियो । तर बायाँतिर मन्दिर हुँदाहुँदै जिल्ला प्रहरी कार्यालय धनुषाका तत्कालीन प्रहरी निरीक्षक बिजय यादवले अर्को मन्दिर निर्माण सुरु गरेका थिए । हाल मधेश प्रदेश प्रहरी कार्यालयका लेखाअधिकृत रहेका यादवले कमिसनकै लागि यादवले उक्त मन्दिर निर्माण गरेको आरोप छ । तत्कालीन प्रहरी निरीक्षक यादवले ३ बर्षअघि सुरु गरेको र निर्माण पूरा नभएको उक्त मन्दिरको उदघाटन गर्न कुनै पनि प्रहरी प्रमुख तयार छैनन् ।

जिल्ला प्रहरी कार्यालय धनुषाका वर्तमान प्रमुख एसपी रुगमबहादुर कुँवर पनि उक्त मन्दिर उदघाटन नगर्ने मनस्थितिमा छन् । आवश्यकता नभएको र बास्तुसमेत नमिलेको उक्त मन्दिर निर्माणमा यादवले गरेको भ्रष्टाचारका बारेमा अख्तियार दुरुपयोग अनुसन्धान आयोगले चासो राख्ने हो भने आफूसमेत तानिने भएपछि ३ बर्षयताका कुनै पनि एसपीले उदघाटन गर्न आनाकानी गरिरहेका छन् ।

यसैबीच, जनकपुरको मुरलीचोकमा गएको फागुन ११ गते भएको सवारी दुर्घटना हुँदा एक ट्राफिक प्रहरीको मृत्यु भएको बिषयमा समेत लेखाअधिकृत बिजय यादव विवादमा परेका छन् । उक्त सवारी दुर्घटनामा मोटरसाइकल चालक इन्स्पेक्टर बिजय यादव सामान्य घाइते भएका छन् भने पछाडि बस्ने ट्राफिक प्रहरी हवल्दारको घटनास्थलमै मृत्यु भएको हो ।

मधेश प्रदेश प्रहरी कार्यालयका लेखाअधिकृत प्रहरी निरीक्षक बिजय यादवले चलाएको उक्त मोटरसाइकललाई टिफरले ठक्कर दिंदा पछाडि बसेकी ट्राफिक प्रहरी जवानको मृत्यु भएको थियो ।

प्रदेश प्रहरी कार्यालयका लेखा अधिकृतले जिल्ला ट्राफिक प्रहरी कार्यालयका जवानलाई मोटरसाइकलमा कहाँ लिएर गएका थिए भन्ने प्रश्नसमेत उठेको छ ।

प्रदेश प्रहरी कार्यालयका लेखा अधिकृतले जिल्ला ट्राफिक कार्यालय महोत्तरीमा कार्यरत जवानलाई मोटरसाइकलमा किन लिएर गएका थिए भन्ने प्रश्न उठिरहेको छ । र, उनले कता लिएर गएका थिए, कसरी दुर्घटना भयो, सीसीटीभी फुटेजसमेत हेरिनुपर्ने मागसमेत भइरहेको छ । पीडित मृतकका पति बैदेशिक रोजगारीमा रहेका छन् ।
प्रदेशका लेखाअधिकृत महोत्तरी किन गए ? महिला ट्राफिक जवानलाई उनले जनकपुरधाम किन ल्याउँदै थिए ? मधेश प्रदेश प्रहरी प्रमुख डीआईजी गोविन्द थपलियासँग स्वीकृति लिएर गएका थिए कि थिएनन् ?

प्रदेश प्रहरीमा अरु कोही प्रहरी अधिकृतबाट यस्तो घटना घटेको भए, त्यो घटना भएकै दिन निलम्बनमा पर्ने अवस्था हुन्थ्यो, तर अहिले एउटा छानबिन समेत बनाइएको छैन । यादवले चलाएको मोटरसाइकलमा महतो थरकी ट्राफिककी जवानको मृत्यु भइसकेपछि छानबिन हुन नसक्नुमा यादवको आईजीपी दानबहादुर कार्कीसँगको निकटताले पनि काम गरेको चर्चा छ ।

सर्वेन्द्र खनाल आईजीपी हुँदा बिजय यादव उनको बडीगार्डका साथै आर्थिक कारोबार हेर्थे यादवले । हालका आईजीपी कार्की खनालको सचिवालयमा पीए थिए । त्यही सम्बन्धका आधारमा यादवमाथि छानबिन हुन नसकेको स्रोत बताउँछ । सर्वेन्द्र खनालले धिरजप्रताप सिंह आईजीपी हुँदा यादवलाई लेखाको तालिममा हाल्न लगाई जिल्ला प्रहरी कार्यालय धनुषामा सरुवा गरेका थिए । धनुषामा कार्यरत रहँदारहँदै मधेश प्रदेश प्रहरीको लेखाअधिकृतमा सरुवा गराएका थिए ।