टिफरले ठक्कर दिंदा ट्राफिक प्रहरी जवानको मृत्यु, इन्स्पेक्टर सामान्य घाइते

जनकपुरधाम । धनुषामा सवारी दुर्घटना हुँदा एक जना ट्राफिक प्रहरीको मृत्यु भएको छ ।  जिल्ला प्रहरी कार्यालय धनुषाका अनुसार जनकपुर उपमहानगरपालिका–४, मुरलीचोकमा सोमबार भएको सवारी दुर्घटनामा मोटरसाइकल चालक इन्स्पेक्टर बिजय यादव सामान्य घाइते भएका छन् भने पछाडि बस्ने ट्राफिक प्रहरी हवल्दारको घटनास्थलमै मृत्यु भएको हो । 

मधेश प्रदेश प्रहरी कार्यालयका लेखाअधिकृत प्रहरी निरीक्षक बिजय यादवले चलाएको उक्त मोटरसाइकललाई टिफरले ठक्कर दिंदा पछाडि बसेकी ट्राफिक प्रहरी जवानको मृत्यु भएको हो । प्रदेश प्रहरी कार्यालयका लेखा अधिकृतले जिल्ला ट्राफिक प्रहरी कार्यालयका जवानलाई मोटरसाइकलमा कहाँ लिएर  गएका थिए भन्ने प्रश्नसमेत उठेको छ ।

लेखा अधिकृत यादवले भने बैंकमा ऋण लिनका लागि सहजीकरण गरिदिनका लागि मोटरसाइकलमा लिएर गएको बताइरहेको प्रहरी स्रोत बताउँछ । प्रहरीका प्रदेशका लेखाअधिकृतले अर्कै कार्यालयको जवानलाई लिएर जानुलाई त्यति स्वभाविक भने मानिएको छैन । इन्स्पेक्टर बिजय यादव सर्वेन्द्र खनाल आईजीपी हुँदा उनको सचिवालयका हर्ताकर्ता थिए । मृतक जवानका परिवारका सदस्य भने बैदेशिक रोजगारीमा बिदेशमा रहेको स्रोत बताउँछ ।