महामन्त्रीद्वयसँग छलफल गर्न देउवा तयार, आजै निर्णायक वार्ता हुने

काठमाडौं । नेपाली कांग्रेसभित्र चर्किएको आन्तरिक विवाद उत्कर्षमा पुगेको छ । पार्टी सभापति शेरबहादुर देउवाले आजै महामन्त्रीद्वय गगनकुमार थापा र विश्वप्रकाश शर्मासँग छलफल गर्ने तयारी गरेका छन् ।

देउवा निवासमा सोमबार अपराह्न बसेको संस्थापन पक्षका नेताहरुको बैठकले बिशेष महाधिवेशन आयोजना गरेका महामन्त्रीद्वय थापा र शर्मासँग छलफल गर्न सभापति र कार्यबाहक सभापतिलाई दिएको छ । सभापति देउवा र कार्यवाहक सभापति पूर्णबहादुर खड्काले महामन्त्रीद्वयसँग छलफल गर्ने र पार्टी बिभाजनबाट जोगाउनेबारेमा आजै राति छलफल गर्ने भएका छन् ।

देउवा निवासबाट बाहिरिने क्रममा कांग्रेस प्रचार विभाग प्रमुख मीन विश्वकर्माले सभापतिले आजै महामन्त्रीहरूसँग संवाद गर्ने जानकारी दिए ।
पार्टीका ५४ प्रतिशतभन्दा बढी महाधिवेशन प्रतिनिधिको मागलाई नेतृत्वले बेवास्ता गरेको आरोप लगाउँदै महामन्त्रीद्वय गगन–विश्वको अगुवाइमा काठमाडौंको भृकुटीमण्डपमा विशेष महाधिवेशन जारी छ ।

१४औं महाधिवेशनका बहुमत प्रतिनिधि महामन्त्रीद्वयले प्रस्तुत गरेको प्रस्तावमाथि छलफलमा जुटिरहेका छन् । बिशेष महाधिवेशनमा पार्टीको नीति र नेतृत्व फेर्नका लागि ६३ प्रतिशतभन्दा बढीले हस्ताक्षर गरिसकेको र अझै त्यो संख्या थपिने क्रम जारी रहेको दाबी महामन्त्रीद्वय थापा र शर्मा पक्षको दाबी छ ।