स्याङ्जाका अधिकांश प्रतिनिधि विशेष महाधिवेशनको पक्षमा

स्याङ्जा । स्याङ्जाका बहुमत प्रतिनिधि विशेष महाधिवेशनको पक्षमा खुलेका छन् । दुई निर्वाचन क्षेत्र रहेको स्याङ्जामा ५२ जना प्रतिनिधिमध्ये ३२ जना खुलेका हुन् ।

विशेष महाधिवेशन माग गर्दै स्याङ्जाका २९ जनाले हस्ताक्षर गरेका थिए । जसमा तीन जना थपिएको नेपाली कांग्रेस स्याङ्जाका सचिव तथा महासमिति सदस्य गुरुप्रसाद भट्टराईले जानकारी दिएका छन् । उनले भने–‘थपिने क्रम जारी छ महाधिवेशन सुरु हुँदासम्म यसमा पाँच–सात जना थपिनेछन् ।’ स्याङ्जामा सचिव भट्टराईले विशेष महाधिवेशनका लागि तयारी तथा संयोजन गर्दै आएका छन् ।

यसअघि विशेष महाधिवेशन माग गर्दै क्षेत्र नं. १ बाट १८ जना र क्षेत्र नं. २ बाट ११ जनाले हस्ताक्षर गरेका थिए ।

विशेष महाधिवेशनको पक्षमा लाग्नेहरुमध्ये पूर्व उपसभापति गोपालमान् श्रेष्ठका नजिकका व्यक्तिहरुसमेत रहेका छन् ।

जिल्ला सभापति तथा निवर्तमान् संघीय सांसद राजु थापा तथा पूर्व प्रदेश सांसद समेत रहेका युवा नेता भागवत प्रकाश मल्ल भने यो विषयमा मौन छन् ।

यस्तै युवानेता विष्णु पौडेल पनि विशेष महाधिवेशनको पक्षमा खुलेर नै लागेका छन् । युवापुस्तामा पार्टी र यसको नेतृत्व जानुपर्ने भन्दै आफू जेनजीको भावन अनुसार सक्रिय रहेको उनको भनाइ छ ।