राप्रपाको समानुपातिक सूचीको बिरोध, पार्टीमा खुस्बु ओलीभन्दा योग्य धेरै महिला छन् : शाही

काठमाडौं । राष्ट्रिय प्रजातन्त्र पार्टीका प्रवक्ता तथा पूर्वसांसद ज्ञानेन्द्र शाहीले पार्टीले पठाएको समानुपातिक सूचीप्रति सुरुदेखि बिरोध गर्दैआएका छन् । शाहीले राप्रपाले समानुपातिक सांसदमा पठाएका नामहरुप्रति सार्वजनिक रुपमा बिरोध गर्दैआएका छन् । समानुपातिक सांसदका उम्मेदवारको सूची पठाउँदा राप्रपामा पैसावाल हावी भएको चर्चा पनि हुन थालेको छ ।

भरत गिरी र खुस्बु ओलीको नाम समानुपातिकको पहिलो नम्बरमा राखिनुमा धनवादले काम गरेको आरोप पार्टी नेतृत्वमाथि लागेको छ । गिरी करोडौंपति हुन् भने ओलीका श्रीमान पनि जग्गाका कारोबारी भएकाले पार्टीमा योगदान र दुःख कष्टभन्दा पनि आर्थिक पक्ष हावी भएको गुनासो प्रकट हुन थालेको छ ।

पार्टीका प्रवक्ता शाहीले त एक टेलिभिजन अन्तर्वार्तामा पार्टीले समानुपातिक सूचीको पहिलो नम्बरमा राखिएकी खुस्बु ओलीको नामै लिएर उनलाई समानुपातिकमा राखिएकोमा बिरोध गरेका छन् ।

शाहीले भनेका छन्–‘खुस्बु ओली क्षमता भएकी मान्छे, उहाँले प्रत्यक्ष चुनाव लड्नुपर्ने हो । राप्रपाले एक सिट त गुमायो नि । समानुपातिक त अर्को मानिस पनि त हुनसक्थ्यो । उहाँले गलत बाटो अपनाउनुभयो, सजिलो बाटो खोज्नुभयो ।

ओलीले चुनाव जितेर आउन सक्नुहुन्थ्यो । त्यसका लागि हामी जे पनि गर्नसक्थ्यौ, चुनाव प्रचार गथ्यौं, समानुपातिक ब्यवस्था भनेको हार्वर्ड पढेका मानिसका लागि होइन । समानुपातिक ब्यवस्था नेपालको संविधानले विपन्नका लागि खडा गरेको हो । राप्रपाले साधारण सदस्य पनि रहन नपाउनेगरी उहाँलाई कारबाही गरेको हो ।

आज राप्रपामा खुस्बु ओलीभन्दा धेरै क्षमता भएका तर विपन्नका छोराछोरी छन् । राप्रपाभित्र खुस्बु भन्दा बढी अध्ययन गरेका सजिना कार्कीजस्ता इन्जीनीयर हुनुहुन्छ । यस्ता कयौैं महिलाहरु राप्रपा जोगाउन लाठी खाएर रगत बगाएर आएका छन् । थुप्रै महिला दिदीबहिनीहरु छन् । चुनाव लडेका छन् पटक पटक । आफ्नो मेहनत र परिश्रम गर्दछन् । हरेक कुरामा अब्बल छन् तर उनीहरुले अवसर पाएका छैनन् ।

उदाहरणका लागि सजिना कार्कीलाई नै लिन सकिन्छ । उहाँ इन्जीनीयर, राम्रो पढेको मानिस हो । अरु कयौं दिदीबहिनी छन् । पार्टी जोगाउन रगत बगाएका छन् । पढाइ र बोल्न पनि अब्बल छन् ।’